ანკარაში შეხვედრა გაიმართა ამერიკის შეერთებული შტატების დაზვერვის ცენტრალური სააგენტოს (CIA) დირექტორ უილიამ ბერნსა და რუსეთის დაზვერვის შეფ სერგეი ნარიშკინს შორის.

რატომ არის მნიშვნელოვანი: როგორც The Guardian წერს არსებობს ვარაუდი, რომ აშშ-ის ზოგიერთ მაღალჩინოსანს სურს, უკრაინა კრემლთან მოლაპარაკებებს აწარმოებდეს ომის დასრულების მიზნით.

  • თუმცა აშშ-ის ეროვნული უშიშროების საბჭოს განცხადებით, შეხვედრაზე არ იყო არანაირი სახის მოლაპარაკება და არ განუხილიათ "უკრაინაში ომის დარეგულირება".
  • აშშ-ს ოფიციალურმა პირებმა თქვეს, რომ შეხვედრის მთავარი მიზანი "რუსეთის მიერ ბირთვული იარაღის გამოყენების შედეგების შესახებ გზავნილის გადაცემა" და რუსეთში პატიმრობაში მყოფი ამერიკელების საქმეების განხილვა იყო.

დეტალები: შეხვედრის შესახებ ინფორმაცია თავდაპირველად კომერსანტმა. გამოცემამ აღნიშნა, რომ არ იცის დისკუსიის მიზანი.

  • The Guardian აღნიშნავს, რომ გასულ კვირას გაჩნდა სპეკულაცია, თითქოს თეთრი სახლის ზოგიერთი უფროსი მრჩეველი ამჯობინებდა ომის დასრულებას.
  • მაგრამ აშშ დათანხმდა უკრაინას დამატებით 400 მილიონი დოლარის სამხედრო დახმარების გაგზავნას.
  • აშშ-ის პრეზიდენტი კი აღნიშნავს, რომ არ შეიძლება საიდუმლო მოლაპარაკებები მიმდინარეობდეს — "ჩვენ არ ვაპირებთ რაიმე მოლაპარაკების დაწყებას. არაფერი უკრაინაზე უკრაინის გარეშე. ეს არის გადაწყვეტილება, რომელიც უკრაინამ უნდა მიიღოს".

გარდა ამისა, CNN-თან ეროვნული უშიშროების საბჭოს სპიკერმა თქვა, რომ აშშ-მ ბარნსის მოგზაურობის შესახებ ინფორმაცია უკრაინას წინასწარ მიაწოდა.

  • "ჩვენ მტკიცედ ვიცავთ ფუნდამენტურ პრინციპს: არაფერი უკრაინაზე უკრაინის გარეშე", — თქვა მან.