მასალა თავდაპირველად გამოქვეყნდა On.ge-ს პარტნიორის, JAMnews-ის ვებსაიტზე.

თბილისში აზერბაიჯანელი ჟურნალისტი, აფგან მუხთარლი. დაიკარგა დაკარგვამდე რამდენიმე დღით ადრე აფგან მუხთარლი ჯემნიუსთან ინტერვიუში აცხადებდა, რომ საქართველოში ყოფნა უსაფრთხო აღარ არის.

თბილისში დაიკარგა აზერბაიჯანელი ჟურნალისტს აფგან მუხთარლი, რომელიც გუშინ სახლიდან გავიდა და არ დაბრუნებულა. მისმა მეუღლემ, ლეილა მუსტაფაევამ უკვე მიმართა პოლიციას. აფგანი ერთ წელზე მეტია თბილისში ცხოვრობს. ჟურნალისტური საქმიანობიდან გამომდინარე მას აზერბაიჯანის ხელისუფლებასთან პრობლემები ჰქონდა.

გასულ კვირას ჯემნიუსმა ვრცელი რეპორტაჟი მოამზადა აზერბაიჯანელ პოლიტდევნილებზე, რომლებიც საქართველოს აფარებენ თავს. ამ რეპორტაჟის ერთ-ერთი გმირი სწორედ აფგანლი იყო. ჯემნიუსთან საუბარში ის ამბობს, რომ ბოლო 6-7 თვეა აზერბაიჯანელ ატქივისტებს საქართველოში პრობლემებს უქმნიან.

ჯემნიუსი დაუკავშირდა აფგანის მეგობარს, აზერბაიჯანელ აქტივისტს დაშგინ აგარალრის, რომელიც ასევე პოლიტიკური თავშესაფრის მაძიებელია და თბილისში ცხოვრობს.

ბოლოს სწორედ აგარალრიმ ნახა დაკარგული აზერბაიჯანელი ჟურნალისტი:

“რვის წუთები იქნებოდა, კოლმეურნეობაზე კაფე “ლოქალ თეისთში” ვიჯექით. აფგანმა თავის ცოლს დაურეკა და კითხა, სახლში მოვდივარ და რამე ხომ არ წამოვიყოლოო. ცოლმა უთხრა, პური წამოიღეო. ამ ზარის შემდეგ, ავდექით და გარეთ გამოვედით. მე იქვე გაჩერებასთან დავდექი, აფგანი ქუჩის მეორე მხარეს უნდა გადასულიყო. ჩემი მარშრუტკა მალე მოვიდა და წავედი. მას შემდეგ აფგანი არავის უნახავს და სახლშიც არ დაბრუნებულა,” – ჰყვება დაშგინ აგარალრი.

მისი თქმით, ბოლო პერიოდში საქართველოში მცხოვრებ აზერბაიჯანიდან გამოქცეულ ჟურნალისტებსა და აქტივისტებზე დევნა გააქტიურდა.

“ჩვენ მუდმივად ვგრძნობდით, რომ გვითვალთვალებდნენ. ყოველთვის დაგვყვებოდა რამდენიმე ადამიანი. აფგანმა ერთხელ ფოტოებიც გადაუღო. ქართველები არ იყვნენ, აზერბაიჯანულად ლაპარაკობდნენ – ისე ახლოს დაგვყვებოდნენ, რომ სულ გვესმოდა აზერბაიჯანული საუბრის ნაწყვეტები,” – ამბობს ის.

ჯემნიუსი ინფორმაციისთვის შინაგან საქმეთა სამინისტროს პრესსამსახურს დაუკავშირდა. იქ თქვეს, რომ ინფორმაციას მოგვიანებით გაავრცელებენ.