ახალი ზელანდიის ისტორიაში პირველად, ქვეყნის კანონმდებლების უმეტესობა ქალია. ყოფილი თავჯდომარე ტრევორ მალარდი ამ პოზიციაზე ცოტა ხნის წინ ლიბერალურ-ლეიბორისტული პარტიის წარმომადგენელმა, სორაია პიკ-მეისონმა, შეცვალა. თანამდებობა დატოვა კიდევ ერთმა პარლამენტარმა კაცმა, ამდენად, საკანონმდებლო ორგანოში გენდერული ბალანსი შეიცვალა — 59 კაცი და 60 ქალი.

"ეს ჩემთვის განსაკუთრებული დღეა, თუმცა, ამავდროულად — ისტორიულიც ახალი ზელანდიისთვის", — ამბობს პიკ-მეისონი.

ამგვარად ახალი ზელანდია იმ რამდენიმე ქვეყანას შეუერთდა, სადაც საკანონმდებლო ორგანოში ნახევარს ან უმრავლესობას ქალები წარმოადგენენ. ასეთი პრეცედენტი უკვე არსებობს კუბაში, მექსიკაში, ნიკარაგუაში, რუანდასა და არაბთა გაერთიანებულ საამიროებში.

ამის მიუხედავად, მსოფლიოში ამ დროისთვის კანონმდებლების მხოლოდ 26 პროცენტია ქალი.

ახალი ზელანდიის პრემიერმინისტრი ჯესინდა არდერნი

ფოტო: Getty Images

აღსანიშნავია, რომ ახალი ზელანდია გენდერული თანასწორობისკენ სწრაფვის კუთხით ყოველთვის გამოირჩეოდა. 1893 წელს ის პირველი ქვეყანა გახდა, სადაც ქალებს არჩევნებში ხმის მიცემის უფლება მიეცათ. ამასთან, ქვეყნის ამჟამინდელი პრემიერმინისტრი, ჯესინდა არდერნი, ახალი ზელანდიის უკვე მესამე ქალი მეთაურია. ოკეანეთის ქვეყანაში ქალებს მნიშვნელოვანი პოზიციები უკავიათ სხვა სახელისუფლებო და სასამართლო სისტემებშიც.

ახალი ზელანდიის კონსერვატიული პარტიის ერთ-ერთი წარმომადგენელი, ნიკოლა უილისი, მოხარულია, რომ მისი შვილი "ისეთ ქვეყანაში იზრდება, სადაც ქალების თანაბარი რეპრეზენტაცია საზოგადოებრივ ცხოვრებაში ჩვეული ამბავია".

თუმცა, როგორც ვახსენეთ, მსოფლიო მასშტაბით სიტუაცია მაინცდამაინც სახარბიელო არაა. მით უმეტეს, რომ ზოგ ქვეყანაში ქალებს არათუ თანაბარი პოლიტიკური შესაძლებლობები, საბაზისო უფლებებიც კი არ გააჩნიათ.

ასევე იხილეთ: