BBC-ის ცნობით, ამის გამო იაპონიის მთავრობამ მოსახლეობას თავშესაფრებში ჩასვლისაკენ მოუწოდა, ზოგიერთ რეგიონში შეფერხდა მატარებლის მოძრაობაც.

რატომ არის მნიშვნელოვანი: 2017 წლის შემდეგ ეს არის ჩრდილოეთ კორეული პირველი რაკეტა, რომელიც იაპონიის თავზე გაუშვეს.

  • გაერო ჩრდილოეთ კორეას ბალისტიკური და ბირთვული იარაღის გამოცდას უკრძალავს.
  • რაკეტების ფრენა სხვა ქვეყნების მიმართულებით ან მათ ცაზე საერთაშორისო ნორმებს ეწინააღმდეგება და უკიდურესად პროვოკაციულ ქმედებად ითვლება.
  • საერთაშორისო მედია ვარაუდობს, რომ ჩრდილოეთ კორეა ამ ნაბიჯით ტოკიოსა და ვაშინგტონის ყურადღების მიქცევას ცდილობს.
  • AP-ის ცნობით, ჩრდ. კორეა ბირთვულ არსენალს აფართოებს, რათა ის, საბოლოო ჯამში, აშშ-ზე ზეწოლისთვის გამოიყენოს.

დეტალები: იაპონიის პრემიერ-მინისტრის ოფისის განცხადებით, რაკეტამ 4 500კმ გაიარა და სავარაუდოდ, წყნარ ოკეანეში დაეშვა.

  • როგორც BBC წერს, ის საკმაოდ ახლოს ჩამოვარდა ამერიკულ კუნძულთან და შესაძლოა დაეზიანებინა, სხვა ტრაექტორიით რომ დაშვებულიყო.
  • პრემიერ-მინისტრმა, ფუმიო კიშიდამ ჩრდილოეთ კორეის ქმედებებს "აღმაშფოთებელი" უწოდა და თქვა, რომ მთავრობა ამ საკითხს შეისწავლის.
  • თავდაცვის მინისტრი, იასუკაზუ ჰამადა კი ამბობს, რომ იაპონია ყველა ვარიანტს განიხილავს, მათ შორის — კონტრშეტევის შესაძლებლობებს, რათა გააძლიერონ თავდაცვა, ჩრდილოეთ კორეიდან მომდინარე საფრთხის ფონზე.