ამის შესახებ საგარეო პოლიტიკისა და უსაფრთხოების საკითხებში ევროკავშირის უმაღლესმა კომისარმა ჯოზეფ ბორელმა ტვიტერზე დაწერა.

რატომ არის მნიშვნელოვანი: უკრაინაში ე.წ. რეფერენდუმები კრემლის მარიონეტულმა ძალებმა გუშინ ჩაატარეს.

  • პროპაგანდისტული მედიის მტკიცებით, წინასწარი შედეგებით ოკუპირებულ დონეცკში, ლუგანსკსა და ზაპოროჟიეში რუსეთთან შეერთების მომხრე 98% იყო, ხერსონში კი 97%.

დეტალები: ბორელმა "რეფერენდუმების" ჩატარება და მათი გაყალბებული შედეგები დაგმო.

  • მისი თქმით, ადამიანის უფლებების სისტემური შეურაცხყოფების ფონზე, ეს უკრაინის სუვერენიტეტისა და ტერიტორიული მთლიანობის კიდევ ერთი დარღვევაა.

კონტექსტი: მას შემდეგ რაც პუტინმა რუსეთში სამხედრო მობილიზაცია გამოაცხადა, ისაუბრა "რეფერენდუმზეც", რომელიც მათ მიერ ოკუპირებულ ტერიტორიებზე იყო დაგეგმილი.

  • "რეფერენდუმი" უკვე რამდენჯერმე გადაიდო, მაშინ ოფიციალური მიზეზი არ იყო ცნობილი, თუმცა Meduza-ს წყაროებმა უკრაინის წარმატებული კონტრშეტევა დაუსახელეს.
  • ომის შემსწავლელმა ინსტიტუტმა ბოლო ანგარიშში განაცხადა, რომ უკრაინის კონტრშეტევა კრემლს პანიკაში აგდებდა, რის გამოც დონეცკისა და ლუგანსკის ე.წ. სახალხო რესპუბლიკების მარიონეტულმა ორგანოებმა მათ ხელმძღვანელობას მოუწოდეს, რომ რეგიონებში სასწრაფოდ ჩაეტარებინათ ე.წ. რეფერენდუმები.