ბრიტანეთში უკვე რამდენიმე თვეა, 4-დღიანი სამუშაო კვირის საპილოტე პროგრამა მიმდინარეობს. ექვსთვიანი პროგრამა, რომელშიც სხვადასხვა სფეროს 70-ზე მეტი კომპანიის 3 300 თანამშრომელი მონაწილეობს, თითქმის სანახევროდაა დასრულებული. 41 კომპანიისგან მიღებული შედეგებით ახლა ამ დროის შეფასებებს აჯამებენ.

35 კომპანია აცხადებს, რომ სამომავლოდ, პროგრამის დასრულების შემდეგაც, 4-დღიანი სამუშაო კვირის დანერგვას განიხილავენ. 41 კომპანიიდან ორის გარდა ყველამ განაცხადა, რომ 4-დღიანმა სამუშაო კვირამ პროდუქტიულობაზე ან არ იმოქმედა, ან გაზარდა. ამასთან, ექვსი კომპანია ირწმუნება, რომ ახალი სამუშაო პირობების შედეგად, თანამშრომლების პროდუქტიულობამ თვალშისაცემად მოიმატა.

4-დღიან სამუშაო კვირაზე საუბარი უკვე ათწლეულებია, მიმდინარეობს. ჯერ კიდევ 1956 წელს, აშშ-ის მაშინდელმა ვიცეპრეზიდენტმა (და მომავალში პრეზიდენტმა) რიჩარდ ნიქსონმა განაცხადა, რომ დიდი დრო არ იყო დარჩენილი იქამდე, სანამ ეს მოხდებოდა. მართალია, კომპანიების უმეტესობას მასშტაბურად დღემდე არ აუტაცებია ეს იდეა, მაგრამ პანდემიის პერიოდში შეცვლილმა გარემოებებმა ბევრი კვლავ დააფიქრა.

"სამსახურზე პანდემიის გავლენას თუ შეხედავთ, შენიშნავთ, რომ სამუშაოს ადგილმდებარეობაზე ხშირად მეტისმეტს ვფიქრობდით", — ამბობს 4-დღიანი სამუშაო დღის მკვლევარი ჯო ო'კონორი, — "დისტანციურ და ჰიბრიდულ მუშაობას ბევრი სარგებელი მოაქვს, მაგრამ გადაწვასა და გადატვირთვას ვერაფერს შველის".

ფოტო: Getty Imagess/iStock

ზემოხსენებულ საპილოტე პროგრამაში მონაწილე ზოგიერთი კომპანიის ხელმძღვანელი ამბობს, რომ 4-დღიანმა სამუშაო კვირამ მათ თანამშრომლებს საშუალება მისცა, გამოთავისუფლებული დრო ოჯახის წევრებისთვის, ვარჯიშისთვის, კულინარიისა და სხვა ჰობისთვის დაეთმოთ. შედეგად, მათი მენტალური მდგომარეობა გაუმჯობესდა, რამაც ისინი მეტად მოტივირებულები და პროდუქტიულები გახადა. ამის საპირწონედ, კრიტიკოსები გაზრდილ ხარჯებსა და შემცირებულ კონკურენტუნარიანობაზე ამახვილებენ ყურადღებას.

საპილოტე პროგრამის ერთ-ერთი მონაწილე კომპანიაც აღნიშნავს, რომ შედეგების შეფასება ნაადრევია, თუმცა, თანამშრომლები სამსახურის ასეთი პირობებით კმაყოფილები არიან და ამიტომ 4-დღიანი სამუშაო კვირის სამომავლოდ გაგრძელებაც განიხილება. ამასთან, განსხვავება არ შეუმჩნევიათ მათ მომხმარებლებს.

ბრიტანეთის მსგავს ექსპერიმენტს ატარებენ სხვა ქვეყნებშიც, მათ შორის, შეერთებულ შტატებში, კანადაში, ირლანდიაში, ახალ ზელანდიასა და ავსტრალიაში. საცდელი პროგრამის შედეგებმა შვედეთის ქალაქ გეტებორგში კი აჩვენა, რომ 4-დღიან სამუშაო კვირაში თანამშრომლებმა იმავე რაოდენობის ან უფრო მეტი საქმე გააკეთეს.