უკრაინის წარმატებული კონტრშეტევის პარალელურად, ოკუპანტები თავს ესხმიან სამოქალაქო ინფრასტრუქტურებს.

რატომ არის მნიშვნელოვანი: უკრაინული მედიების ცნობით, რუსების იერიშის შედეგად ელექტროენერგია არ მიეწოდება ხარკოვის ოლქის სხვადასხვა დასახლებას.

  • ელექტროენერგიის მიწოდების პრობლემებია პოლტავასა და სუმის ოლქებშიც;
  • უკრაინსკა პრავადა წერს, რომ ინფრასტრუქტურის დაბომბვის გამო, შესაძლოა, ამ ოლქების მიმართულებით მატარებლის რეისები გადაიდოს.

კონტრშეტევის ბოლო ცნობები: 10 სექტემბერს ცნობილი გახდა, რომ უკრაინამ გაათავისუფლა ქალაქი კუპიანსკი და მიიწევდა იზიუმისკენ.

  • არსებული ინფორმაციით, ოკუპანტები ამ დროისთვის ტოვებენ იზიუმს და იქ უკრაინული დროშა ბრუნდება;
  • ლუგანსკის რეგიონის ადმინისტრაციის განცხადებით, უკრაინელი სამხედროები უკვე იმყოფებიან ლისიჩანსკის გარეუბანში;
  • სამხედრო ადმინისტრაციის უფროსის ხელმძღვანელმა, სერგეი გაიდაიმ გამოაქვეყნა პოსტი, სადაც მიანიშნებდა ლისიჩანსკის სწრაფი დეოკუპაციის შესახებ.

ISW ამბობს, რომ 5 დღეში უკრაინამ იმაზე მეტი ტერიტორია გაათავისუფლა, ვიდრე რუსეთმა აპრილის შემდეგ დაიპყრო.

  • მათი განცხადებით, უკრაინის შეიარაღებულმა ძალებმა რუსული ხაზები 70 კილომეტრის სიღრმით გაარღვიეს და 6 სექტემბრის შემდეგ, ბოლო 5 დღეში 3 000 კვადრატულ კილომეტრზე მეტი დაიკავეს.