ევროკავშირის ანგარიშის მიხედვით, 2021 წლის განმავლობაში და 2022 წლის პირველ ნახევარში ევროკავშირის კანონმდებლობასთან დაახლოება გრძელდებოდა, თუმცა აღნიშნულია უკუსვლა გარკვეულ სფეროებში.

რატომ არის მნიშვენლოვანი: ეს ევროკავშირის საქართველოსთან ასოცირების შესახებ შეთანხმების შესრულების ყოველწლიური ანგარიშია.

  • მასში მიმოხილულია საქართველოს მიერ გასული წლის განმავლობაში შეთანხმების ფარგლებში გატარებული რეფორმები.

დეტალები: დოკუმენტის მიხედვით, ეროვნული კანონმდებლობის ევროკავშირის კანონმდებლობასთან შესაბამისობაში მოყვანა ღრმა და ყოვლისმომცველი თავისუფალი სავაჭრო სივრცის (DCFTA) შესახებ შეთანხმების ფარგლებში კარგად მიმდინარეობს

  • ამის მიუხედავად, აღნიშნულია, რომ მომსახურების სფეროში გარკვეული შეფერხებები არსებობს.
  • ანგარიშში საუბარია შარლ მიშელის შეთანხმებაზე და ნათქვამია, რომ ის ნაწილობრივ შესრულდა.

თუმცა, ანგარიშში ვკითხულობთ, რომ 2021 წელს გამოწვევები ქვეყნის დემოკრატიულ საფუძვლებს ძირის გამოთხრის საფრთხეს უქმნიდა. ამის მაგალითად მოყვანილია:

  • 2020 წლის საპარლამენტო არჩევნების შემდეგ შეზღუდვები პარლამენტის ფუნქციონირებაში;
  • ადგილობრივი არჩევნების ჩატარების ხარვეზები;
  • 2021 წლის ივლისის ძალადობა ჟურნალისტებისა და LGBTIQ ადამიანების წინააღმდეგ შემდგომი არსებითი გამოძიების გარეშე;
  • ცნობები ქართული და დიპლომატიური საზოგადოების ნაწილის მოსმენების შესახებ.

სასამართლო რეფორმა: დოკუმენტში აღნიშნულია, რომ გასული წლის განმავლობაში სასამართლო სისტემის რეფორმა შეფერხდა და ძირითად სფეროებში რეგრესიც კი განიცადა.

  • "რამდენიმე უმნიშვნელოვანესი კანონი დაჩქარებული წესით იყო მიღებული პარლამენტის მიერ ევროკავშირის ან ევროპის საბჭოს სტანდარტებთან შესაბამისობის შესახებ აუცილებელი კონსულტაციებისა და ანალიზის გარეშე".
  • "ეს კანონები სასამართლო სისტემის ფუნქციონირებას, დანიშვნის საკვანძო პროცედურებს, ფარული თვალთვალის პროცედურებს და სახელმწიფო ინსპექტორის სამსახურის დაშლას მოიცავდა".

რუსეთის ომი უკრაინაში: EU-ის ანგარიშში ვკითხულობთ, რომ ომს სერიოზული შედეგები მოჰყვა საქართველოსთვის უსაფრთხოების ვითარების კუთხით, რაც გამწვავდა თვითგამოცხადებულ რეგიონებში რუსეთის ჯარების ყოფნით.

  • დოკუმენტში წერია, რომ მთავრობამ რუსეთსა და ბელარუსს სანქციები არ დაუწესა, მაგრამ მიიღო ზომები ევროკავშირის ზოგიერთი სანქციის პრაქტიკაში განსახორციელებლად და სანქციების გვერდის ავლის თავიდან ასაცილებლად.

არჩევნები: ანგარიშში აღნიშნულია, რომ საპარლამენტო არჩევნების ჩატარებაზე გავლენა მოახდინა ამომრჩევლებზე ზეწოლასთან დაკავშირებულმა, ასევე, წინასაარჩევნო კამპანიის განმავლობაში და არჩევნების დღეს მმართველ პარტიასა და სახელმწიფოს შორის ზღვარის ბუნდოვანების შესახებ გავრცელებულმა ბრალდებებმა.

  • EU მიიჩნევს, რომ ამან პროცესის ზოგიერთი ასპექტის მიმართ საზოგადოების ნდობა შეამცირა.

ღირსების მარში: ანგარიშში ნათქვამია, რომ 5 ივლისს მთავრობამ და სამართალდამცავებმა მშვიდობიანი შეკრების უფლება და მომიტინგეების უსაფრთხოება საკმარისად ვერ დაიცვეს.

  • "თავდამსხმელების წინააღმდეგ სამართლებრივი ღონისძიებები გრძელდება, თუმცა კოორდინირებული თავდასხმის ორგანიზატორებს ბრალი არ წაუყენეს.

სახალხო დამცველი: ევროკავშირი მიიჩნევს, რომ ომბუდსმენი და ომბუდსმენის აპარატი აქტიურად აგრძელებდა თავის სამეთვალყურეო როლის შესრულებას.

  • "მისი მანდატის შესაბამისად გაცემული რეკომენდაციები საქართველოს ხელისუფლებამ მხოლოდ ნაწილობრივ შეასრულა".
  • "ოფისმა განიცადა ზეწოლა იმის გამო, რომ ხმამაღლა ეხმაურებოდა გარკვეულ პოლიტიკურად სენსიტიურ საკითხებს, მათ შორის თბილისის პრაიდს და ყოფილი პრეზიდენტის სააკაშვილის პატიმრობის პირობებს".

თანასწორი უფლებები და მოპყრობა: დოკუმენტში ვკითხულობთ, რომ გენდერული თანასწორობა კვლავ გამოწვევად რჩება, განსაკუთრებით გენდერული და ოჯახში ძალადობის საკითხები.

  • "თანასწორი უფლებები და მოპყრობა, განსაკუთრებით ლგბტიქ თემის მიმართ, 2021
    წელს ზეწოლას ექვემდებარებოდა, რაც 2021 წლის 5 ივლისის ძალადობამ აჩვენა".