15 წლის ლაბრადორ რეტრივერმა, სახელად ფრედმა, უკვე მესამედ მოირგო მშობლის როლი. სულ ცოტა ხნის წინ ძაღლმა იხვის დაობლებული ჭუჭულები იშვილა.

ფრედი ასე წინათაც მოქცეულა. რამდენიმე წლის წინ, როცა იგი 10 წლის იყო, ცხრა პატარა შინაური ფრინველი შეიფარა და მათზე ზრუნავდა. მოგვიანებით, ცნობილი გახდა, რომ ესექსის საგრაფოში მცხოვრებმა ძაღლმა კიდევ ერთხელ იშვილა მშობლების გარეშე დარჩენილი ჭუჭულები.

ამჯერად კი, უკვე გამოცდილი მშობელი, მესამედ უვლის და-ძმა ჭუჭულებს. ისინი მშობლის გარეშე მას შემდეგ დარჩნენ, რაც დედა ერთ ღამეს უგზო-უკვლოდ დაიკარგა. როცა იგი დიდი ხნის განმავლობაში აღარ გამოჩნდა, ფრედმა გადაწყვიტა, პატარებისთვის თავად მიეხედა. ასე რომ, ახლა ჭუჭულები სწორედ მას ეხუტებიან, ძაღლი კი თავის ზურგზე შემომსხდარ შვილობილებს ბედნიერი დაატარებს აქეთ-იქით.

ფოტო: Mountfitchet Castle

ცხოველებთან ერთად მცხოვრებმა ადამიანებმა ცოტა ხნის წინ ფეისბუქზეც გამოაქვეყნეს ფრედისა და ჭუჭულების ფოტოები. ფრედის პატრონის, ჯერემი გოლდსმითის თქმით, სულაც არ უკვირს, ცუგამ რომ ახალი ოჯახი იპოვნა.

"15 წელია, მყავს და მთელი ამ ხნის განმავლობაში იგი სხვა ცხოველებთან ძალიან დიდ დროს ატარებს", — ჰყვება ჯერემი, — "გადარჩენილ ცხოველებზე ზრუნვა უკვე მისი ბუნების ნაწილია".

ფოტო: Mountfitchet Castle

ჭუჭულები ფრედთან მანამდე დარჩებიან, სანამ საკმარისად არ წამოიზრდებიან, რომ დამოუკიდებლად განაგრძონ ცხოვრება.