ჟურნალისტური ეთიკის ქარტია 5 ივლისის ძალადობიდან ერთი წლის თავზე განცხადებას აქვეყნებს და არსებულ მედიაგარემოს აფასებს. ქარტიაში აღნიშნავენ, რომ გასულ წელს ხელისუფლებამ მედიის წარმომადგენლების დაცვა არ უზრუნველყო, ჟურნალისტებსა და აქტივისტებზე თავდასხმის ორგანიზატორები კი პასუხისგებაში დღემდე არ მისცა.

ორგანიზაცია მიუთითებს, რომ ხელისუფლება მედიის წარმომადგენლებთან აგრესიული რიტორიკით საუბარს აგრძელებს, მათზე თავდასხმის ათობით საქმე კი კვლავ გამოუძიებელია.

  • "ასეთი მიდგომა კიდევ უფრო მეტად ახალისებს მედიის წარმომადგენლებზე ძალადობას".
  • "ჩვენი ქვეყნის ევროატლანტიკური ინტეგრაციისთვის აუცილებელია მედიის თავისუფლება და უსაფრთხოება".

ქარტია ხელისუფლებას მოუწოდებს, მედიაგარემოს გაჯანსაღებისთვის დაუყოვნებლივ გადადგას ქმედითი ნაბიჯები.

რატომ არის მნიშვნელოვანი: ზუსტად ერთი წლის წინ, 5 ივლისს რუსთაველის გამზირზე, სადაც ღირსების მარში იყო დაგეგმილი, პრორუსულმა ძალადობრივმა ჯგუფებმა და სასულიერო პირებმა დააორგანიზეს ძალადობა — აქტივისტების ოფისები დაარბიეს, ფიზიკურად გაუსწორდნენ 50-ზე მეტ ჟურნალიტს.

  • ნაცემი ოპერატორი, ლექსო ლაშქარავა 11 ივლისს გარდაიცვალა.
  • ამ დრომდე არ დასჯილან ჰომოფობიური ჯგუფის ლიდერები, რომლებიც ღიად აანონსებდნენ ძალადობას Tbilisi Pride-ის აქტივისტებისა და რუსთაველზე შეკრებილების წინააღმდეგ.
  • იმ პირებს, რომლებსაც ბრალი ჰქონდათ წაყენებული, მინიმალური სანქციები შეეფარდათ.

არქივიდან: გასული წლის 5 ივლისის დილას პრემიერმინისტრმა, ირაკლი ღარიბაშვილმა Tbilisi Pride-ის ბრალეულობაზე ისაუბრა და მაშინ, როდესაც ძალადობრივი ჯგუფები იყვნენ გამოსული, აქტივისტებს პროვოკაცია დააბრალა.

  • არასამთავრობო სექტორმა ღარიბაშვილის განცხადება ძალადობის წახალისებად შეაფასა.