საქართველოს მუსლიმთა კავშირის თავმჯდომარე, ტარიელ ნაკაიძე ბათუმის მერი ბრძანებას, მეჩეთის აშენების ნებართვის არ გაცემის შესახებ, პოლიტიკურ გადაწყვეტილებად აფასებს. მისი თქმით, მეჩეთის არ აშენების სამართლებრივი საფუძველი არ არსებობს. ამის შესახებ ნაკაიძემ On.ge-ს განუცხადა.

"ამით ბათუმის მერიამ და ზოგადად, ხელისუფლებამ მუსლიმი თემის მიმართ, საქართველოს მოსახლეობის 10 პროცენტის მიმართ, გამოხატა უარყოფითი დამოკიდებულება და თქვა, რომ მე მათ უფლებებს ვარღვევ," - ამბობს ნაკაიძე და დასძენს, რომ ხელისუფლებას მუსლიმი თემის უფლებები არაერთხელ დაურღვევია.

ნაკაიძის თქმით, მუსლიმი თემი მერის ამ გადაწყვეტილების გასაჩივრებას გეგმავს, რითაც ფიქრობს, რომ "საქართველოს დემოკრატიასაც უშველის".

"ხელისუფლებამ და ბათუმის მერიამ ფეხქვეშ გათელა საქართველოს დემოკრატია და თქვა, რომ მე ბათუმში, აჭარაში, საქართველოში არ მაინტერესებს დემოკრატია. ეს აღარ არის მხოლოდ მეჩეთის მშენებლობა, ესაა დემოკრატიის ნაწილი. ჩვენ, როგორც საქართველოს პატრიოტებს, არ შეგვიძლია უარი ვთქვათ საქართველოს დემოკრატიულ განვითარებაზე," - აღნიშნა ნაკაძიემ.

მუსლიმი თემი აჭარაში მეჩეთის აშენებას წლებია ითხოვს, თუმცა, ქალაქ ბათუმის მუნიციპალიტეტის მერმა 5 მაისს მეჩეთის აშენების უფლება არ გასცა. მის მიერ გამოცემული ბრძანებით ირკვევა, რომ ბათუმის მერიამ გადაწყვეტილება დასახლებათა ტერიტორიების გამოყენებისა და განაშენიანების საკითხთა კომისიის დასკვნაზე დაყრდნობით მიიღო.

"ქალაქ ბათუმის მუნიციპალიტეტის მერია იზიარებს იმ მოსაზრებას, რომ სამშენებლო მიწის ნაკვეთი წარმოადგენს საცხოვრებელ ზონა 6-ს," - აღნიშნულია ბრძანებაში.

თვითმმართველი ქალაქის – ბათუმის ტერიტორიაზე დასახლებათა ტერიტორიების გამოყენებისა და განაშენიანების რეგულირების წესების მიხედვით, საცხოვრებელი ზონა 6 არის მაღალი ინტენსივობის საცხოვრებელი ზონა (განაშენიანების დომინირებული სახეობა – საცხოვრებელი სახლები).