ნაციონალური მოძრაობის ლიდერის, ნიკა მელიას განცხადებით, ქართულ ოცნებას აქვს 2 კვირა, რათა დაასრულოს ევროპული მომავლის საბოტაჟი, მედიაზე ზეწოლა, პოლიტიკური დევნა. მისი თქმით, 24 ივნისამდე მმართველმა გუნდმა სწორი დასკვნები უნდა გააკეთოს. როგორც ოპოზიციური პარტიები საუბრობენ, ევროკავშირი წევრობის კანდიდატის სტატუსის მინიჭებასთან დაკავშირებით გადაწყვეტილებას სწორედ 24 ივნისს მიიღებენ.

"საქართველოს ევროპული გზის შეფერხებაში პასუხს აგებს ბიძინა ივანიშვილი და მისი ხელისუფლება. თქვენ გაქვთ 2 კვირა მეგობრებო, იქ, ქართულ ოცნებაში. თქვენ უნდა დაასრულოთ საქართველოს ევროპული მომავლის საბოტაჟი, თქვენ უნდა დაასრულოთ მედიაზე ზეწოლა, თქვენ უნდა დაასრულოთ პოლიტიკური დევნა და ამ ორი კვირის განმავლობას, 24 ივნისამდე თქვენ მკაფიო სიგნალი და იმპულსი უნდა გააგზავნოთ ჩვენს ევროპელ მეგობრებთან, რომ გააკეთეთ თქვენთვის მწარე მაგრამ სწორი დასკვნები", — ამბობს მელია.

მისივე თქმით, ევროპარლამენტის მიერ ერთმნიშვნელოვნად გაცხადდა, რომ ევროპა მზად არის მიანიჭოს საქართველოს კანდიდატის სტატუსი. აღნიშნა, რომ ერთადერთი წინაღობა ქართველ ხალხსა და ევროპას შორის არის ოლიგარქი ივანიშვილი და ქართული ოცნება.

"დღეს მიღებული უმაღლესი პოლიტიკური დოკუმენტით ევროპამ გვითხრა, რომ ასე გაგრძელება აღარ შეიძლება და დროა, თბილისში გაანალიზოთ, რა დევს სასწორზე საქართველოს მომავლისთვის. სასწორზე დევს ჩვენი ისტორიული მისწრაფებები, არჩევანი თაობების მიერ სისხლით და ოფლით მოტანილი იდეა, რომ ქართველმა ხალხმა უნდა იცხოვროს საკუთარ მიწაზე, ერთიან საქართველოში", — ისაუბრა მელიამ.

არსებული ინფორმაციით, ევროპარლამენტმა საქართველოში მედიისა და ჟურნალისტების უსაფრთხო გარემოს შესახებ რეზოლუცია მიიღო, სადაც ბიძინა ივანიშვილისთვის სანქციების დაწესებაზეც არის საუბარი. რეზოლუციას მხარი 308 დეპუტატმა დაუჭირა, 218 კი წინააღმდეგი იყო.

ინფორმაციის გავრცელებას ქართული ოცნების თავმჯდომარის, ირაკლი კობახიძის ბრიფინგი მოჰყვა. კობახიძემ ევროპარლამენტარებს ე.წ ფეიკის მსხვერპლები უწოდა. ასევე, თქვა, რომ რეზოლუციაში არაერთი "ფაქტობრივი უზუსტობა და ტყუილია".

კობახიძემ დოკუმენტის შინაარსიც გააკრიტიკა, ივანიშვილის "მიღწევები" ჩამოთვალა და აღნიშნა, რომ "რეზოლუციას, რომელიც ივანიშვილის სანქცირებას ითხოვს, ჩალის ფასი აქვს". მმართველი პარტიის თავმჯდომარემ თქვა ისიც, რომ საქართველოსთვის, უკრაინისა და მოლდოვასთვის "კანდიდატის სტატუსის მინიჭებას არავითარი პრაქტიკული შედეგი არა აქვს".

კობახიძის განცხადებას უკვე მოჰყვა კრიტიკაც. სახალხო დამცველის, ნინო ლომჯარიას თქმით, ძალიან სუსტია არგუმენტი, რომ ევროპარლამენტარები ფეიკ ნიუსების მსხვერპლი არიან.