"კამპანიამ, რომელიც 2012 წლიდან წარმოებს კრიმინალების დასაცავად და ამ კრიმინალების ხელისუფლებაში დასაბრუნებლად, ევროკავშირის ერთ-ერთ უმაღლეს ინსტიტუტამდე, ევროპარლამენტამდე მიაღწია", — ასე ეხმაურება ქართული ოცნების თავმჯდომარე, ირაკლი კობახიძე საქართველოზე რეზოლუციის მიღებას, რომელშიც ბიძინა ივანიშვილის სანქციებზეა საუბარი

კობახიძის აზრით, ევროპარლამენტი ე.წ ფეიკის მსხვერპლი გახდა და ამას სამწუხაროსა და შემაშფოთებელს უწოდებს. კობახიძის მტკიცებით, რეზოლუციაში არაერთი "ფაქტობრივი უზუსტობა და ტყუილია". მისივე თქმით, "უკიდურესად შემაშფოთებელია, როდესაც კონკრეტული პირები ახერხებენ რეზოლუციაში ესოდენ უხეში ფაქტობრივი ტყუილები და უზუსტობები შეაპარონ".

"მაგალითისათვის, რეზოლუციაში ვკითხულობთ, რომ ხელისუფლება დღემდე უარს ამბობს სააკაშვილის კერძო კლინიკაში გადაყვანაზე, როდესაც სააკაშვილი დღესაც სწორედ კერძო კლინიკაში იმყოფება. ასევე, რეზოლუციაში ვკითხულობთ, რომ ლექსო ლაშქარავა 5 ივლისს მიყენებული დაზიანებების შედეგად გარდაიცვალა, როდესაც გარდაცვალების რეალური მიზეზი საზოგადოებისთვის კარგად არის ცნობილი", — ამბობს ის.

მმართველი პარტიის თავმჯდომარე "პარადოქსს" უწოდებს, რომ მიხეილ სააკაშვილისა და გვარამიას გათავისუფლების მოწოდებების ფონზე, ევროპარლამენტის რეზოლუცია "პოლიტიკიდან გასულ ბიძინა ივანიშვილს ლამის ქართული დემოკრატიის მტრად აცხადებს" და მის წინააღმდეგ სანქციების დაწესებას მოითხოვს.

არსებული ინფორმაციით, ევროპარლამენტმა საქართველოში მედიისა და ჟურნალისტების უსაფრთხო გარემოს შესახებ რეზოლუცია მიიღო, სადაც ბიძინა ივანიშვილისთვის სანქციების დაწესებაზეც არის საუბარი. რეზოლუციას მხარი 308 დეპუტატმა დაუჭირა, 218 კი წინააღმდეგი იყო.