ქართულ ოცნებაში ფიქრობენ, რომ ევროპარლამენტის მიერ საქართველოზე მიღებული რეზოლუცია, სადაც ბიძინა ივანიშვილის სანქციებზეცაა საუბარი, შეიძლება აღქმული იქნას მინიშნებად, რომ ქვეყანა კანდიდატი ქვეყნის სტატუსს არ მიიღებს. ამის შესახებ პარტიის თავმჯდომარე, ირაკლი კობახიძემ გამართულ ბრიფინგზე ისაუბრა.

"ევროპარლამენტის რეზოლუცია შეიძლება აღქმულ იქნეს როგორც ერთგვარი მინიშნება, რომ საქართველოს, უკრაინისა და მოლდოვისგან განსხვავებით, ევროკავშირის წევრობის კანდიდატის სტატუსი შეიძლება არ მიენიჭოს. ასე თუ მოხდება, ბუნებრივია, ეს იქნება სრულიად ალოგიკური და უსამართლო გადაწყვეტილება, რაზეც საქართველოში მშვიდობით, სამართლის უზენაესობითა და ეკონომიკური წინსვლით დაინტერესებულ ყველა ადამიანს თავისი რეაქცია ექნება", — განაცხადა მან.

კობახიძის აზრით, ეს "ოპოზიციის გათვლაა". მისი თქმით, ოპოზიციის გათვლით, საქართველოსთვის კანდიდატის სტატუსის არმიღებას საზოგადოების ნაწილის, "განსაკუთრებით ახალგაზრდების მღელვარება და ენმ-ის მიერ ხელისუფლების გადატრიალება" მოჰყვება.

"ამ ყველაფრის დასასრული კი საქართველოს ომში ჩართვაა, რისთვისაც ასე გულმოდგინედ იღწვიან მთელი ეს თვეები ნაციონალური მოძრაობა და მისი მფარველები", — დასძინა კობახიძემ.

გავრცელებული ინფორმაციით, ევროპარლამენტმა საქართველოში მედიისა და ჟურნალისტების უსაფრთხო გარემოს შესახებ რეზოლუცია მიიღო, სადაც ბიძინა ივანიშვილისთვის სანქციების დაწესებაზეც არის საუბარი. რეზოლუციას მხარი 308 დეპუტატმა დაუჭირა, 218 კი წინააღმდეგი იყო.

ამავე თემაზე: