პრეზიდენტ სალომე ზურაბიშვილის განცახდებით, მთავარი არხის დირექტორის, ნიკა გვარამიას დაკავების გადაწყვეტილება პოლიტიკურად დროული არ ყოფილა. როგორც ის ამბობს, სასამართლოს გადაწყვეტილების შინაარსს არ შეაფასებს, თუმცა სხვა გადაწყვეტილების მიღება შესაძლებელი იყო.

"მე როგორც პრეზიდენტს არ შემიძლია, რომ ეჭვები წარმოვთქვა სასამართლოს მიმართ. შემიძლია მხოლოდ ერთი რამ ვთქვა, რომ პოლიტიკურად ამ დროს, ამ გადაწყვეტილების მიღება, რომელიც შეიძლება გადავადებულიყო სხვადასხვა ფორმით, პოლიტიკურად მიმაჩნია, რომ არ იყო დროული. სასამართლოს გადაწყვეტილების შინაარსზე არაფერს ვიტყვი. როგორც ყველამ, ვიცი, რომ იყო სხვადასხვა ვარიანტი სასჯელის, ვიდრე ის, რაც იქნა მიღებული, მაგრამ ამაზე მე შეფასებას არ გავაკეთებ", — ამბობს ის პალიტრანიუსის ეთერში.

სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: