TV პირველის დირექტორი, ვატო წერეთელი აცხადებს, რომ მთავარი არხის დირექტორს, ნიკა გვარამიას დაკავებით "ბიძინა ივანიშვილმა ქვეყანა უფსკრულში გადაჩეხა და ევროპული გზა მოუჭრა". მისი თქმით, მალე გვარამიას ციხეში "ივანიშვილი ჩაანაცვლებს".

"ნიკა გვარამიას რომ ძალიან მალე ბიძინა ივანიშვილი ჩაანაცვლებს, ამაში ათასი პროცენტით ვარ დარწმუნებული. ჩემი ოჯახის სასამართლოც კი გრძელდება აპელაციაში, თუმცა ეს არაფერს არ ცვლის. დღეს ნიკა გვარამიას დაჭერით საქართველოს პირდაპირ მოუჭრა დასავლური და ევროპული გზა, ამით ქვეყანა გადაჩეხა უფსკრულში და ეს მას ასე არ გაუვა, მასზე იქნება დარწმუნებული ვარ სანქციებიც და მალე ჩაანაცვლებს ნიკა გვარამიას", — განაცხადა მან ფორმულასთან კომენტარში.

დღეს, სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა. გაუქმდა აღკვეთის ღონისძიების სახე გირაო, ასევე, 2019 წლის 4 ოქტომბრის განჩინებით ქონებაზე დადებული ყადაღა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.