მთავარი არხის დამფუძნებლისა და დირექტორის, ნიკა გვარამიას ცოლი, სოფო ლილუაშვილი აცხადებს, რომ სასამართლოს ასეთ გადაწყვეტილებას არ ელოდა.

"ძალიან რთულია, არ ველოდი, გულწრფელად არ ველოდი, მხოლოდ იმის თქმა შემიძლია ახლა, რასაც ჩემს შვილებს ვეტყვი სკოლიდან რომ გამოვლენ, რომ გამაგრნენ, გავერთიანდეთ და ნიკასთან ერთად ყველამ ერთად მოვიპოვოთ თავისუფლება", — თქვა მან.

სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა დღეს, 16 მაისიდან დაიწყო და მოსამართლემ გვარამიას დაუყოვნებლივ დაკავების ბრძანება გასცა.

გაუქმდა აღკვეთის ღონისძიების სახე გირაო, ასევე, 2019 წლის 4 ოქტომბრის განჩინებით ქონებაზე დადებული ყადაღა. მოგვიანებით, ადვოკატმა დიმიტრი საძაგლიშვილმა დააზუსტა, რომ ნიკა გვარამია გაამტყუნეს "საწარმოსთვის ზიანის მიყენების გამო".

რაც შეეხება დანარჩენ ორ ბრალდებულს — სასამართლომ ზურაბ იაშვილი გაამართლა და გააუქმა, როგორც გირაო, ასევე, ქონებაზე დადებული ყადაღა, ხოლო კახა დამენიას მუხლი გადაუკვალიფიცირეს და სასჯელის სახედ და ზომად 50 000 ლარი განუსაზღვრეს.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.