ბოლო 5 წლის განმავლობაში პირველად, საქართველოს რკინიგზა მოგებაზე გავიდა. ამის შესახებ კომპანიის 2021 წლის ფინანსური ანგარიშიდან ხდება ცნობილი.

საქართველოს რკინიგზამ 2017-2020 წლებში ყოველი წელი ზარალით დაასრულა, ხოლო 2021 წელს 52,7-მილიონიანი მოგება ნახა.

კომპანიის ფინანსური მაჩვენებლები ბოლო წლების განმავლობაში ასეთია:

  • 2017 წელი — 354,1 მილიონი ლარის ზარალი;
  • 2018 წელი — 716,5 მილიონი ლარის ზარალი;
  • 2019 წელი — 5,6 მილიონი ლარის ზარალი;
  • 2020 წელი — 164 მილიონი ლარის ზარალი;
  • 2021 წელი — 52,7 მილიონი ლარის მოგება.

საქართველოს რკინიგზის 2021 წლის ფინანსურ ანგარიშის მიხედვით, გასულ წელს კომპანიამ 547,9 მილიონი ლარის შემოსავალი მიიღო, რაც წინა წლის იმავე პერიოდის მაჩვენებელს 58,5 მილიონით აღემატება. სხვა სახის შემოსავლებმა 9 მილიონს მიაღწია — ეს მონაცემი წლიურად 3,6 მილიონით არის შემცირებული.

გასულ წელს კომპანიამ ხელფასებისთვის 180,7 მილიონი ლარი გასცა, რაც 2020 წლის სახელფასო ბიუჯეტს 10,2 მილიონით აღემატება. სხვა საოპერაციო ხარჯების მოცულობა კი ამგვარად განაწილდა:

  • ცვეთისა და ამორტიზაციის ხარჯი — 58,4 მილიონი ლარი;
  • ელექტორიენერგიის, საჭირო მასალებისა და ტექნიკური მომსახურების ხარჯი — 54,6 მილიონი ლარი;
  • სხვა სახის საოპერაციო ხარჯები — 97,8 მილიონი ლარი.

შეგახსენებთ, რომ სს საქართველოს რკინიგზა ქვეყნისთვის სტრატეგიული მნიშვნელობის კომპანიაა, რომლის 100%-იანი წილის მფლობელი საქართველოს საპარტნიორო ფონდია.