თავდაცვის მინისტრის მრჩევლის, ალექსეი კპოიტკოს განცხადებით, "რუსულო სამხედრო გემო, იძი ნა ხ*ის" ავტორი სხვა მესაზღვრე იყო, რომელმაც ტყვეობაში 1,5 თვე გაატარა. მისი თქმით, რეალური ავტორის ვინაობას მისი უსაფრთხოებისთვის მალავდნენ. ინფორმაციას ამის შესახებ უკრაინული მედია ავრცელებს.

"იმ საზღვაო ქვეითის ფრაზის ავტორად დასახელებით, რომელიც უკვე გათავისუფლებული იყო ტყვეობიდან, მოვახერხეთ, გამოგვეხსნა ის მესაზღვრეც, რომელმაც რეალურად თქვა ეს ფრაზა. სხვა სიტუაციაში, მას არ გაათავისუფლებდნენ ან აწამებდნენ, ან წამებით გატეხავდნენ და აიძულებდნენ კამერასთან რუსული პროპაგანდის ფრაზები გაეჟღერებინა", — განაცხადა მან და აღნიშნა, რომ საზღვაო ქვეითმა საკუთარ თავზე აიღო საჯაროობა, რითიც მესაზღვრე გადაარჩინა.

მანამდე ზმეინის კუნძულის სასაზღვრო დაცვის უფროსმა თქვა, რომ რუსები მესაზღვრეებს სთავაზობდნენ ჩაბარებულიყვნენ და აეღოთ მაღალი ხელფასი, რასაც არ დათანხმდნენ. მანვე დაადასტურა, რომ რადიო კავშირთან მხოლოდ მესაზღვრეებს ჰქონდათ შეხება.

"მე ვიყავი ამ ფრაზის წარმოთქმის მოწმე, ფრაზის ავტორი 1,5 თვე იყო ტყვეობაში, ახლა თავისუფალია", — განაცხადა მან.

UNIAN წერს, რომ ინფორმაცია მათ სახელმწიფო სასაზღვრო წარმომადგენელმა, ანდრეი დემჩენკომ დაუდასტურა. მისი თქმით, ამ ფრაზის მებრძოლისთვის და არა მესაზღვრისთვის მიწერა, იყო საინფორმაციო ოპერაცია, რათა არავინ დაშავებულიყო, რადგან იმის გამო, რომ რადიო კავშირთან წვდომა მხოლოდ მესაზღვრეებს ჰქონდათ, ტყვეობაში ყოფნისას ოკუპანტები მათ მიმართ "განსაკუთრებულ ყურადღებას" იჩენდნენ.

მისივე განცხადებით, სახელს გაასაჯაროებენ მაშინ, როცა ამის შესაძლებლობა იქნება. დემჩენკომ დაამატა, რომ ზმეინის ყველა მცველი გმირია, ამიტომაც ერთმანეთის გვერდი-გვერდ იდგნენ.

მანამდე ამ ფრაზას უკრაინელ მებრძოლს, რომან გრიბოვს მიაწერდნენ, რომელიც ტყვეობიდან 29 მარტს გაათავისუფლეს.

რა მოხდა კუნძულ ზმეინიზე

25 თებერვალს ცნობილი გახდა, რომ რუსები უკრაინული კუნძულის აღებას ცდილობდნენ. მალევე გავრცელდა ჩანაწერიც, სადაც ისმოდა, რომ რუსული სამხედრო გემი მოუწოდებდა კუნძულზე მყოფ უკრაინელ მესაზღვრეებს დანებებულიყვნენ, თუმცა პასუხად მიიღეს: "რუსულო სამხედრო გემო, იძი ნა ხ*ი".

ფრაზა მალევე იქცა წინააღმდეგობის სიმბოლოდ და მსოფლიოს მასშტაბით არაერთი საპროტესტო აქციის სლოგანი გახდა.

25 თებერვალს სხვადასხვა წყაროდან გავრცელდა ინფრომაცია იმაზე, რომ რუსებმა კუნძული დაბომბეს და მცველები დაიღუპნენ. პრეზიდენტმა, ვოლოდიმირ ზელენსკიმაც განაცხადა, რომ ჯარისკაცები გმირულად დაიღუპნენ, მაგრამ კუნძული არ დათმეს და ყველას გმირის წოდება მიანიჭა.

თუმცა მოგვიანებით, ინფორმაცია დაზუსტდა და გაირკვა, რომ მესაზღვრეები რუსებს ტყვედ ჰყავდათ აყვანილი.