რა ხდება: რუსთავი 2-ის საინფორმაციო სამსახურის ხელმძღვანელის, ნინო შუბლაძის WhatsApp-ის სტატუსად დღეს გამოჩნდა ტექსტი, რომელიც, სავარაუდოდ, დირექტივას ჰგავდა.

  • სტატუსი მალევე წაიშალა.
  • ინფორმაციას ფორმულა ავრცელებს.

დეტალები: ტექსტში ეწერა:

"ეს თემა ასაწევია, როგორ იყენებენ ფეხბურთელებს, თან ძებნილი კეზერაშვილი აკეთებს კომენტარს, მეტი ლუსტრაცია რაღა გინდა".

  • ფორმულასთან შუბლაძე ამბობს, რომ არ იცის, როგორ მოხვდა ეს ტექსტი მის ანგარიშზე, რადგან ჯერ კიდევ ეძინა, როცა დაურეკეს ამის შესატყობინებლად.
  • ის ვარაუდობს, რომ მის WhatsApp-ში ვიღაცამ შეაღწია.

"მეორე რაღაც ლინკიც ყოფილა, ის არც კი მაქვს. სქრინი მაქვს ჩემივე სტატუსის, რომელიც აქეთ ჩამიგდეს 11-ის ნახევარზე, გამაღვიძეს", — ამბობს ნინო შუბლაძე.

  • რაც შეეხება მის მიერ ნახსენებ ლინკს, საუბარია The Guardian-ის სტატიაზე "ქართველი ფეხბურთელები აპროტესტებენ უცხოური გავლენის შესახებ კანონს", რომელშიც მოყვანილია, მათ შორის, დავით კეზერაშვილის ციტატა, სადაც ის ამბობს, რომ "ფეხბურთელების გადაწყვეტილება, მხარი დაუჭირონ პროტესტს, შესაძლოა იყოს გადამწყვეტი, სულ რამდენიმე კვირის შემდეგ, რაც ევროპის ჩემპიონატზე მათი გასვლა მილიონებმა აღნიშნეს".

კონტექსტი: რუსული კანონის წინააღმდეგ 16 აპრილის ხალხმრავალი პროტესტის შემდეგ, როდესაც ღამით, მთავრობამ სპეცრაზმის ძალის გამოყენებით დაარბია მშვიდობიანი პროტესტის მონაწილეები და დამოუკიდებელი მედიის ჟურნალისტები, საქართველოს ეროვნული ნაკრების ფეხბურთელები სოციალურ ქსელებში აქვეყნებდნენ პროევროპულ განცხადებებს.

  • პოზიციების უმეტესობაში აღნიშნული იყო, რომ მხარს უჭერენ საქართველოს ევროპულ მისწრაფებებს, თუმცა, ფეხბურთელების გამოხმაურებებში არ იყო დაგმობილი ხელისუფლების ანტიდასავლური კურსი.