რა ხდება: რუსეთში ერთ-ერთმა ყველაზე მსხვილმა გამომცემლობა AST-მა, იტალიელი რეჟისორისა და მწერლის, პიერ პაოლო პაზოლინის ბიოგრაფიის ნაწილი დააცენზურა.

  • ამის შესახებ მედიაზონა წერს.

დეტალები: რობერტო კარნეროს წიგნი "პაზოლინი. მოკვდი იდეებისთვის" აპრილის შუა რიცხვებში გამოქვეყნდა. გამომცემლის ვებგვერდზე ნათქვამია, რომ ტექსტი „შემოკლდა 478-ე ფედერალური კანონის საფუძველზე".

  • სავარაუდოდ, საუბარია 2022 წელს მიღებულ ლგბტ პროპაგანდის აკრძალვის კანონზე.

როგორც რუსული ტელეგრამ არხი ოსტოროჟნო ნოვოსტი წერს, ბიოგრაფია აანალიზებს "პაზოლინის ცვალებად შემოქმედებით დისკურსს და მის მუდმივ თემებს: ადრეული ცხოვრება, ურთიერთობა რელიგიასთან და პოლიტიკასთან“.

  • თუმცა, მკითხველი მნიშვნელოვან ნაწილს გამოტოვებს: წიგნის, დაახლოებით, მეხუთედი დაცენზურებულია.
  • წიგნიდან თითქმის მთლიანად ამოღებულ იქნა პაზოლინის სექსუალურობისა და პირადი ურთიერთობების თემა, ის ღიად გეი იყო.
  • ცენზურას დაექვემდებარა სქოლიოები და ლექსებიც კი.

ცენზურის შესახებ წიგნზე მითითებული არ არის.