რა ხდება: ცნობილი გახდა საქართველოს შესახებ ევროპარლამენტის რეზოლუციის საბოლოო პროექტი.

• ამ პროექტს, ევროპარლამენტი, სავარაუდოდ, ხვალ უყრის კენჭს.

დეტალები: პროექტში წერია, რომ ევროპარლამენტი:

• კატეგორიულად გმობს საკამათო კანონპროექტის ხელახლა შეტანას, რადგან მიიჩნევს, რომ ეს კანონი დაუწესებს შეზღუდვებს სამოქალაქო საზოგადოებასა და დამოუკიდებელ მედიას და ამით ძირს გამოუთხრის მათ თავისუფლად მოქმედების შესაძლებლობას. ამან უკვე გამოიწვია საქართველოს მოსახლეობის, სამოქალაქო საზოგადოების ორგანიზაციების, დამოუკიდებელი მედიის, ცნობილი საჯარო პირების და ქვეყნის ევროპელი და საერთაშორისო პარტნიორების მასობრივი პროტესტი.
• ხაზს უსვამს, რომ კანონპროექტი შეუთავსებელია ევროკავშირის ღირებულებებთან და დემოკრატიულ პრინციპებთან, ეწინააღმდეგება საქართველოს ევროკავშირში გაწევრიანების ამბიციებს, აზიანებს საქართველოს საერთაშორისო რეპუტაციას და საფრთხეს უქმნის ქვეყნის ევროატლანტიკურ ინტეგრაციას;
• ხაზს უსვამს, რომ ევროკავშირში გაწევრიანების მოლაპარაკებები არ უნდა გაიხსნას მანამ, სანამ ეს კანონი საქართველოს სამართლებრივი წესრიგის ნაწილია;
• ამიტომ მოუწოდებს საქართველოს პარლამენტს, შეწყვიტოს საპარლამენტო საქმისწარმოება, რომელიც მიგვიყვანს კანონის მიღებამდე და მოუწოდებს საქართველოს მთავრობას, შეასრულოს ვალდებულებები, რომლებიც 2023 წლის მარტში აიღო, როდესაც განაცხადა, რომ უპირობოდ უკან გაიწვევდა კანონპროექტს და მსგავს კანონს აღარასოდეს დააინიციირებდნენ. მოუწოდებს საქართველოს მთავრობას, ასევე, თავი შეიკავოს შემდგომი საკანონმდებლო წინადადებებისაგან, რომლებიც ეწინააღმდეგება დემოკრატიის, კანონის უზენაესობის, ადამიანის უფლებებსა და ძირითად თავისუფლებებს და, შესაბამისად, ეწინააღმდეგება ევროკავშირის წევრობის კოპენჰაგენის კრიტერიუმებს;
• კანონპროექტი ღალატობს ქართველი ხალხის დიდი უმრავლესობის მისწრაფებებს, იცხოვროს დემოკრატიულ საზოგადოებაში, გააგრძელოს დემოკრატიული და კანონის უზენაესობის რეფორმები, განაგრძოს მჭიდრო თანამშრომლობა ევროატლანტიკურ პარტნიორებთან და მტკიცედ იდგეს ევროკავშირში გაწევრიანების გზაზე;
• ხაზს უსვამს, რომ გამოხატვისა და შეკრების თავისუფლებისა და მშვიდობიანი პროტესტის უფლება არის ფუნდამენტური თავისუფლებები და დაცული უნდა იყოს ნებისმიერ ვითარებაში, განსაკუთრებით, ევროკავშირში გაწევრიანების მსურველ ქვეყანაში;
• მოუწოდებს საქართველოს მთავრობას პატივი სცეს საქართველოს მოქალაქეების კონსტიტუციურ უფლებებს და, შესაბამისად, გამოთქვამს შეშფოთებას სპეცრაზმის მიერ სადავო კანონპროექტის წინააღმდეგ დემონსტრანტების დასაშლელად არაპროპორციული ძალის გამოყენების შესახებ მიღებული ცნობების გამო; მოუწოდებს საქართველოს ხელისუფლებას გამოიძიოს და პასუხისგებაში მისცეს ისინი, ვინც პასუხისმგებელია ძალის უკანონო და არაპროპორციულ გამოყენებაზე;
• ხაზს უსვამს, რომ საზოგადოებრივი დამკვირვებლის როლი, რომელიც აკისრია სამოქალაქო საზოგადოებასა და დამოუკიდებელი მედიას, არსებითია დემოკრატიული საზოგადოებისთვის და გადამწყვეტია ევროკავშირში გაწევრიანებასთან დაკავშირებული რეფორმების წინსვლისთვის, ამიტომ მოუწოდებს საქართველოს ხელისუფლებას, ყველაფერი გააკეთოს იმისათვის, რომ უზრუნველყოს ხელსაყრელი გარემო, რომელშიც სამოქალაქო საზოგადოება და დამოუკიდებელ მედიას შეუძლია განვითარდეს.
• გმობს იმ ფაქტს, რომ საქართველოს მთავრობა ინსპირაციას იღებს უაღრესად საკამათო მსგავსი რუსული კანონმდებლობისგან, როგორიცაა კანონი "უცხოელი აგენტების შესახებ“, რომელიც მიზანმიმართულად ახდენს სამოქალაქო საზოგადოების ორგანიზაციებისა და აქტივისტების დისკრიმინაციას და ასევე, გამოიყენება ოპოზიციის ჩასახშობად, რომელიც უკრაინაში ომის წინააღმდეგია.
• აღნიშნავს, რომ 2023 წლის 14 და 15 დეკემბერს ევროპულმა საბჭომ საქართველოს მიანიჭა კანდიდატის სტატუსი იმის გაგებით, რომ გადაიდგმება შესაბამისი ნაბიჯები, რომლებიც მითითებულია კომისიის 2023 წლის 8 ნოემბრის რეკომენდაციაში; ხაზს უსვამს, რომ ეს რეკომენდაცია მოუწოდებს საქართველოს, უზრუნველყოს სამოქალაქო საზოგადოების შესაძლებლობა, თავისუფლად მოქმედებდეს და ებრძოლოს დეზინფორმაციას ევროკავშირისა და მისი ღირებულებების წინააღმდეგ. ეს კანონპროექტი არღვევს ორივე მიზანს;
• შეახსენებს საქართველოს მთავრობას იმ ღირებულებებისა და პრინციპების მიმართ ერთგულების ვალდებულების შესახებ, რომელიც მან ევროკავშირში გაწევრიანებაზე განაცხადის დროს აიღო და მოვუწოდებთ კომისიის ვიცე-პრეზიდენტს/კავშირის უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში, გააკეთონ იგივე;
• მოუწოდებს კომისიას, წარადგინოს საქართველოს პროგრესის შუალედური შეფასება 2023 წლის 8 ნოემბრის კომისიის რეკომენდაციაში მითითებული ცხრა ნაბიჯის განხორციელებასთან დაკავშირებით;
• მოუწოდებს კომისიას და წევრ სახელმწიფოებს, შეაფასონ ამ კანონპროექტის გავლენა ევროკავშირის, როგორც დონორის როლზე საქართველოში და ნათლად მიაწოდონ ინფორმაცია საქართველოს მთავრობასა და პარლამენტს ამ შესაძლო ზემოქმედებისა და ზოგადად, ევროკავშირის დაფინანსებაზე მისი შედეგების შესახებ;
• მოუწოდებს საქართველოს მთავრობას, დაუბრუნდეს თავის ევროპულ გზას, შეინარჩუნოს ვალდებულება, პატივი სცეს, გააძლიეროს და ხელი შეუწყოს დემოკრატიას, კანონის უზენაესობას, ადამიანის უფლებებსა და ფუნდამენტურ თავისუფლებებს და ჭეშმარიტად ჩაერთოს პირობების შესასრულებლად საჭირო ნაბიჯების სრულად განხორციელებაში საქართველოს სამოქალაქო საზოგადოებასთან და პოლიტიკურ ოპოზიციასთან ჩართულობისა და თანამშრომლობის სულისკვეთებით;
• კიდევ ერთხელ გამოხატავს ურყევ მხარდაჭერას ქართველი ხალხის ლეგიტიმური ევროპული მისწრაფებებისადმი და მათი სურვილისადმი, იცხოვროს კორუფციისგან თავისუფალ ქვეყანაში, რომელიც სრულად პატივს სცემს ფუნდამენტურ თავისუფლებებს, იცავს ადამიანის უფლებებს და უზრუნველყოფს ღია საზოგადოებასა და დამოუკიდებელ მედიას; ხაზს უსვამს, რომ საქართველოს ევროკავშირის კანდიდატის სტატუსის მინიჭების გადაწყვეტილება მოტივირებული იყო საქართველოს სამოქალაქო საზოგადოების მიღწევებისა და დემოკრატიული ძალისხმევის აღიარების სურვილით, ისევე როგორც მის მოქალაქეებს შორის ევროკავშირში გაწევრიანების აბსოლუტური მხარდაჭერით;
• მოუწოდებს მიუკერძოებელ და დამოუკიდებელ გრძელვადიან საერთაშორისო არჩევნების სადამკვირვებლო მისიას, დააკვირდეს ქვეყნის მომავალ საპარლამენტო არჩევნებს 2024 წლის ოქტომბერში.

ბოლო ხაზი: ევროპარლამენტში, თავდაპირველად, რეგისტრირებული იყო ხუთი პოლიტიკური ჯგუფის მიერ მომზადებული რეზოლუციის პროექტები.

• ზოგიერთ მათგანში საუბარი იყო სანქციების დაწესებაზეც კონკრეტული პირების მიმართ.
• მოგვიანებით კი ერთობლივ ტექსტზე შეჯერდნენ.