სისხლის მაღალი წნევა, იგივე ჰიპერტენზია, მრავალი დაავადებისა და ჯანმრთელობის პრობლემის რისკის წინაშე გვაყენებს. ამან შესაძლოა, გულის, თირკმლებისა და სხვა ორგანოების ფუნქციონირება შეაფერხოს და ჩვენს სიცოცხლეს საფრთხე შეუქმნას.

2017 წელს, ამერიკულმა კარდიოლოგიურმა ასოციაციამ (ACC) და კარდიოლოგიის აკადემიამ (AHA) ჰიპერტენზია განსაზღვრა 130/80 მმ. ვწყ. სვ. ან მეტი მაჩვენებლით, იქამდე კი ეს ზღვარი 140/90 მმ. ვწყ. სვ. იყო. აღსანიშნავია, რომ ამ ახალი ნორმის მიხედვით, მხოლოდ აშშ-ის მოსახლეობის თითქმის ნახევარს სისხლის მომატებული წნევა აწუხებს.

მსგავსი მდგომარეობის ყოველთვის გაკონტროლება შეუძლებელია, მაგრამ ცხოვრების რეჟიმში გარკვეული ცვლილებების შეტანა თავის დაცვის საშუალებას გვაძლევს. ამ სტატიაში სწორედ ასეთ ნაბიჯებზე გესაუბრებით.

რჩევები

ადამიანის ასაკი, ეთნიკური წარმომავლობა, ოჯახის სამედიცინო ისტორია და სხვა დეტალები ჰიპერტენზიის უკონტროლო რისკ-ფაქტორებია, რომელთა წინააღმდეგაც უძლურნი ვართ. ამის მიუხედავად, ყოველდღიურობაში სასარგებლო ჩვევების გამომუშავებით საშიშროების თავიდან აცილება შეგვიძლია.

• შეინარჩუნეთ ჯანსაღი წონა — შეიძლება ითქვას, რომ ჰიპერტენზიის დროს წონას გადამწყვეტი მნიშვნელობა ენიჭება. კარგი იქნება, თუ ზედმეტი კილოგრამების არსებობის შემთხვევაში, მათ დაიკლებთ, ნორმალური წონის ქონისას კი მას შეინარჩუნებთ. გახსოვდეთ, რომ თუნდაც მცირე ცვლილება თქვენს ჯანმრთელობაზე დადებით გავლენას ახდენს.
• დააბალანსეთ დიეტა — სისხლის წნევის დასარეგულირებლად, ყურადღება მიაქციეთ კვების რაციონს. ეცადეთ, ხილი, ბოსტნეული და მთლიანი მარცვლეული მიიღოთ, ხოლო გაჯერებულ ან ტრანს ცხიმებსა და შაქარს მოერიდოთ. უნდა შეიზღუდოს წითელი ხორცი, ნატრიუმით მდიდარი პროდუქტები და ტკბილეული.
• თავი შეიკავეთ მარილის მიღებისგან — მარილის რაოდენობის შესამცირებლად, არ მიირთვათ გადამუშავებული და ჭარბი ნატრიუმის შემცველი საკვები. ასევე, ნუ დაამატებთ კერძებს მარილს, რადგან ეს მინერალი სისხლის წნევას ზრდის.
• ივარჯიშეთ — ფიზიკური აქტივობა ჰიპერტენზიასთან ბრძოლის ეფექტიანი საშუალებაა. რაც უფრო მეტს ივარჯიშებთ, მით უკეთ იგრძნობთ თავს, თუმცა არაინტენსიური დატვირთვაც სასარგებლოა. ყოველკვირეულად სასურველია, ჯამში 150-წუთიანი აერობიკა ან 75-წუთიანი ენერგიული ვარჯიში.

• შეზღუდეთ ალკოჰოლი — დიდი რაოდენობით ალკოჰოლური სასმლის მიღებამ შესაძლოა, წნევის აწევა გამოიწვიოს, ამიტომ შეეცადეთ, მასზე უარი თქვათ ან მცირე მოცულობით დალიოთ.
• მოერიდეთ სტრესს — მართალია, სტრესსა და ჰიპერტენზიას შორის კავშირს მეცნიერები ჯერ კიდევ იკვლევენ, მაგრამ ცნობილია, რომ ის ამ დაავადების განვითარების რისკ-ფაქტორების გამწვავებას უწყობს ხელს. მას ჯანმრთელობაზე ისეთივე ეფექტი აქვს, როგორც არაჯანსაღ კვებასა და ალკოჰოლს. სპეციალისტები გვირჩევენ, რომ სტრესის შესამცირებლად მედიტაციას მივმართოთ.
• აკონტროლეთ წნევა — თუ ჰიპერტენზია გაწუხებთ, სისხლის წნევა რეგულარულად გაიზომეთ, რადგან მის მომატებას ხშირად სიმპტომები სულაც არ ახლავს თან.

შესაძლოა, ცხოვრების ახალ რეჟიმთან შეგუება თავიდან გაგიჭირდეთ, ამიტომ, თუ თქვენთვის უფრო მოსახერხებელია, მიზნამდე პატარა ნაბიჯებით მიდით, შემდეგ კი ყოველდღიურ რუტინად აქციეთ.

გასათვალისწინებელია, რომ ჰიპერტენზია ყოველთვის ასეთი მარტივი დასამარცხებელი არაა. შესაბამისად, აუცილებლად მიმართეთ ექიმს და ჩაიტარეთ შემოწმებები, რომ არაფერი გამოგრჩეთ. საჭიროების შემთხვევაში, სპეციალისტი მკურნალობის კურსს დაგინიშნავთ და უკეთ დაგაკვალიანებთ.

რუბრიკის სპონსორია ექიმო. ექიმო არის აპლიკაცია, რომელიც სამედიცინო სერვისების მიღებას გიმარტივებთ. მისი გამოყენებით, შეძლებთ სახლში გამოიძახოთ ლაბორატორიული ანალიზები, დაჯავშნოთ ექიმთან ვიზიტი, რიგში დგომის გარეშე მიიღოთ სამედიცინო მომსახურება, მოძებნოთ მედიკამენტები და ელექტრონულად მიიღოთ კვლევებისა და მედიკამენტების დანიშნულებები, დიაგნოზები და სადაზღვევო მიმართვები.