პენტაგონის პრესსპიკერის, ჯონ კირბის განცხადებით, რუსეთის თავდასხმის მიუხედავად, მარიუპოლი არ დაცემულა. მისი თქმით, ოკუპანტების მზარდი აგრესიული ქმედებების მიუხედავად, უკრაინა მათ წინააღმდეგობას უწევს.

"ჩვენ თვალს ვადევნებთ რუსეთის საჰაერო თავდასხმებისა და არტილერიის მოძრაობას დონბასში და სამხრეთით. განსაკუთრებით, მარიუპოლის მიმდებარე ტერიტორიებსა და ქალაქის შიგნით", — თქვა კირბიმ.

მარიუპოლი ომის დაწყების პირველივე დღეებიდან ალყაშია, ის ხშირად გახდა თავდასხმის ობიექტი, მათ შორის, მშვიდობიან მოსახლეობაზე. ოკუპანტები სწორედ მარიუპოლში თავს დაესხნენ სამშობიაროს და ბავშვთა საავადმყოფოს. მათ ასევე დაბომბეს თეატრი, სადაც ასობით მშვიდობიანი მოქალაქე აფარებდა თავს. განადგურებულია ქალაქის ინფრასტრუქტურა.

ქალაქში ვერ ხერხდება ჰუმანიტარული დახმარების შეტანა. წითელი ჯვარი მარიუპოლის ტერიტორიაზე ვერ შედის. ქალაქს მარიუპოლის მცველები — აზოვის ბატალიონი და 36-ე საზღვაო ქვეითი ბრიგადა იცავს. ბრიგადამ ალყის გარღვევა და აზოვის ბატალიონთან შეერთება 13 აპრილ შეძლო.

იკრაინის მაღალი თანამდებობის პირები ამბობენ, რომ ქალაქი ჰუმანიტარული კატასტროფის ზღვარზეა. უკრაინის პრეზიდენტი ვოლოდიმირ ზელენსკი და საგარეო საქმეთა მინისტრი დმიტრო კულება ამბობენ, რომ მარიუპოლი მოლაპარაკებების პროცესში, შესაძლოა წითელი ხაზი გახდეს.

რუსეთმა მარიუპოლის მცველებს 17 აპრილს ულტიმატუმი წაუყენა და დანებება მოსთხოვა, რაზეც უარი მიიღო. ამის შემდეგ, რუსეთის თავდაცვის სამინისტრო ქალაქის მცველების განადგურებით დაიმუქრა.

უკრაინის პრემიერმინისტრმა, დენის შმიგალმა 17 აპრილს ისაუბრა, რომ ქალაქი ჯერ კიდევ არ დაცემულა და იქ კვლავ რჩებიან უკრაინის სამხედრო ძალები.