ქუთაისის არასრულწლოვანთა რეფერირების ცენტრის სამი თანამშრომლიდან ორს: სოციალური მუშაკსა და ფსიქოლოგს ხელშეკრულებას აღარ უგრძელებენ. სოციალური მუშაკი ანა ენდელაძე ეჭვობს, რომ მას პოლიტიკური მოსაზრების გამო ათავისუფლებენ.

რეფერირების ცენტრი რთული ქცევის მქონე არასრულწლოვანებთან მუშაობს და თუ ახალ კადრებს არ აიყვანენ, მხოლოდ ერთი თანამშრომელი რჩება. ამ პირობებში ცენტრის ნორმალური ფუნქციონირება კითხვის ნიშნის ქვეშ დგას. ინფორმაცია ნეტგაზეთი ავრცელებს.

ანა ენდელაძის მსგავსად, დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული ბიუროს კიდევ 10-მდე სოციალურ მუშაკს აცნობეს, რომ 2025 წლიდან მათი ხელშეკრულებები აღარ გაგრძელდება. სოციალურ მუშაკთა გაერთიანებამ ამის შესახებ განცხადება გაავრცელა, სადაც ისინი ეჭვს გამოთქვამენ, რომ გათავისუფლება პოლიტიკური მიზეზებით მოხდა.

გამოცემის ინფორმაციით, ქუთაისის რეფერირების ცენტრის ჯერ კიდევ მოქმედ სოციალურ მუშაკს, ანა ენდელაძეს ბიუროს ადმინისტრაციიდან გუშინ დაურეკეს და უთხრეს, რომ ხელშეკრულება, რომელიც 31 დეკემბერს სრულდება, აღარ გაუგრძელდება. ენდელაძე ამბობს, რომ სატელეფონო საუბრისას მისთვის მიზეზები არ აუხსნიათ. მან ხელმძღვანელობას ოფიციალური მეილიც მისწერა, რომელზე პასუხიც ამ დრომდე არ მიუღია.

“ჩემთვის პირადად არ უთქვამთ, მაგრამ იმასაც ასახელებენ, რომ ფინანსური კრიზისის გამო ვართ ჩვენ გათავისუფლებული. თუმცა ესეც არალოგიკურად მიმაჩნია, ვინაიდან ჩვენი, ფსიქოლოგის და სოციალური მუშაკის გარეშე, ქუთაისის ცენტრი როგორ იფუნქციონირებს?! აღარ დარჩა სპეციალისტები. მაშინ საერთოდ უნდა დაიხუროს. ამ შემთხვევაში როგორ ხდება ბავშვების ინტერესების გათვალისწინება, ესეც ცალკე საკითხია", — ამბობს ენდელაძე.

ენდელაძე ამბობს, რომ მიმდინარე საპროტესტო აქციების ფონზე, სოციალური მუშაკები საჯაროდ და აქტიურად აფიქსირებენ თავიანთ პოზიციას ქვეყნის ევროპული მომავლის დასაცავად. 20 დეკემბერს მათ გაავრცელეს ერთობლივი განცხადება, შეუერთდნენ სამოქალაქო საზოგადოების იმ ნაწილს, რომლებიც ხელახალი არჩევნების დანიშვნასა და აქციებზე დროს დაკავებული მოქალაქეების გათავისუფლებას მოითხოვენ. 21 დეკემბერს ამ მოთხოვნებით საპროტესტო აქცია და მარში გამართეს.

"ჩვენი პოლიტიკური შეხედულებები საჯაროა. მე პირადად ამ მარშზე ფიზიკურად ვერ ვიყავი, იმიტომ, რომ ქუთაისში ვარ დასაქმებული და ვერ მოვახერხე, რომ თბილისში ჩამოვსულიყავი, თუმცა, ზოგადად, სოციალური მუშაკები ემიჯნებიან ევროინტეგრაციის შეჩერებას და ჩვენ ხელიც მოვაწერეთ შესაბამის განცხადებას.
მე ვერ ვიტყვი, რომ სამსახურში ჩემი ზემდგომები ან ხელმძღვანელები პოლიტიკური ნიშნით რამეს მომიწოდებდნენ, ან ზეწოლა იყო, ან რაიმე განხილვა გვქონდა ამ თემასთან დაკავშირებით. მე არავინ შემხებია. უბრალოდ, სხვა ობიექტური მიზეზი არ არსებობს. არ ვიცი, რატომ შეიძლება გვათავისუფლებდნენ. ამიტომ, მე მაქვს ეჭვი, რომ გამომდინარეობს იმ პოლიტიკური პროცესებიდან, რაც დღეს ქვეყანაში მიმდინარეობს", — ამბობს ანა ენდელაძე.

სოციალური მუშაკი წუხს, რომ კადრების არარსებობის შემთხვევაში ბავშვები, რომლებთანაც მუშაობდა, შესაბამისი სერვისების და ზრუნვის გარეშე დარჩებიან.

გამოცემა დაუკავშირდა იუსტიციის სამინისტროს, რომლის დაქვემდებარებაშიცაა პრობაციის ეროვნული ბიურო. უწყებაში ადასტურებენ ინფორმაცია, რომ 10-მდე სოციალურ მუშაკს ხელშეკრულებებს აღარ უგრძელებენ. თუმცა არ განმარტავენ, რა გახდა ამის საფუძველი, აიყვანენ თუ არა მათ ნაცვლად სხვა კადრებს, როგორ გააგრძელებს ბიურო, განსაკუთრებით რეგიონული ცენტრები მუშაობას და ა.შ.