ორგანიზაციის, პარტნიორობა ადამიანის უფლებებისთვის [PHR] განცხადებით, 25 დეკემბერს, შეზღუდული შესაძლებლობის მქონე აქტივისტ ქალს, თათია დათაშვილს მისი საქმიანობის და მკაფიო სამოქალაქო პოზიციის დაფიქსირების გამო, შეურაცხმყოფელი და მუქარის შემცველი შეტყობინებები გაუგზავნეს.

"PHR ეხმიანება აქტივისტისა და უფლებადამცველის, თათია დათაშვილის მიმართ უკიდურესად შეურაცხმყოფელი და სიძულვილის შემცველი ენის გამოყენებას, მისი აქტივიზმისა და საქმიანობის გამო.

ორგანიზაციას მიაჩნია, რომ კერძო პირების მხრიდან აქტივისტებსა და უფლებადამცველებზე თავდასხმა წახალისებულია სახელმწიფოს მხრიდან, რაც გამომდინარეობს მსგავსი ქმედების დაუსჯელობის ტენდენციასა და სიძულვილის წამახალისებელი პოლიტიკიდან. ასევე, სახელმწიფო პოლიტიკა, ერთმნიშვნელოვნად, არაა ორიენტირებული ადამიანის ღირსებისა და უფლებების დაცვაზე", — წერს ორგანიზაცია.

მათივე განცხადებით, საქმეზე უკვე მიმართეს შინაგან საქმეთა სამინისტროს და მათგან სწრაფი და ადეკვატური ზომების მიღება მოითხოვეს.