გერმანიის საგარეო საქმეთა სამინისტრო მინისტრ ანალენა ბერბოკის წერილს აქვეყნებს, სადაც ის ოცნების ხელისუფლების მიერ ევროკავშირში გაწევრიანების პროცესის შეჩერებას და ქვეყანაში მიმდინარე საპროტესტო ტალღას ეხმაურება. ბერბოკი წერს, რომ ქართული ოცნების მზარდი ავტორიტარული პოლიტიკის გამო, ევროკავშირში საქართველოს გაწევრიანების პროცესის ოფიციალურად შეჩერებაზე უნდა იმსჯელონ.

"ბებიები, რომლებიც ყინვას უძლებენ და საპოლიციო ძალების ხელკეტები არ აშინებთ; სრულად სველი ახალგაზრდები წყლის ჭავლს ევროპული დროშებით უპირისპირდებიან; ოპოზიციის ლიდერები, რომლებსაც სასტიკად სცემენ და აკავებენ; კვირების განმავლობაში ათიათასობით ქართველი გაბედულად აწყობდა დემონსტრაციას საკუთარი ქვეყნის ევროპული მომავლისთვის ყველაზე პატარა სოფლებსა და დიდ ქალაქებში.

საქართველოში მოსახლეობის უმრავლესობას სურს, რომ მათმა ქვეყანამ გააგრძელოს ევროპული გზა. მათ გულში აქვთ ევროპა და პროევროპული პროტესტი ისმის მათ ხმაში. მაგრამ მათ მმართველი პარტია ქართული ოცნების ხელმძღვანელები დაშინებით, ძალადობითა და წყლის ჭავლით პასუხობენ. ანტიევროპული კურსით ქართულმა ოცნებამ მიზანმიმართულად გაყინა საქართველოს ევროკავშირში გაწევრიანების პროცესი და ფაქტობრივად შეაჩერა. ქართული ოცნების მზარდი ავტორიტარული პოლიტიკის გამო, ევროკავშირში ახლა ჩვენ უნდა ვიმსჯელოთ საქართველოს გაწევრიანების პროცესის ოფიციალურად შეჩერებაზე", — წერს მინისტრი.

ანალენა ბერბოკის წერს, რომ ოცნების ხელისუფლება EU-ში გაწევრიანების შესახებ მოლაპარაკებების შეჩერებით ისტორიულ შესაძლებლობას კარგავს, რომელსაც ევროკავშირი ქვეყანას სთავაზობს. ამის გამო, გერმანიის მთავრობა კონსულტაციებს აწარმოებს ევროკავშირის პარტნიორებთან შემდგომი დამატებითი შესახებ, რაც მოიცავს საქართველოს ოფიციალური პირებისთვის უვიზო მიმოსვლის გაუქმებას და მიზანმიმართულ სანქციებს.

"2023 წლის დეკემბერში საქართველოსთვის ევროკავშირის კანდიდატის სტატუსის მინიჭება რეფორმების მკაფიო დაპირებებთან იყო დაკავშირებული. ეს ყოველთვის ცხადი იყო ქართული ოცნების პასუხისმგებელი პირებისთვის. მაგრამ პროგრესის ნაცვლად, ჩვენ ვხედავთ საგანგაშო უკუსვლას: არჩევნები, რომელსაც მკვეთრად აკრიტიკებენ საერთაშორისო დამკვირვებლები, არაპროპორციული ძალადობა დემონსტრანტების მიმართ. ქართული ოცნება ამით კარგავს ისტორიულ შესაძლებლობას, რომელსაც ევროკავშირი სთავაზობს ქვეყანას.

ბოლო კვირებისა და თვეების განმავლობაში, პარტია ქართულმა ოცნებამ ქვეყანა უფრო და უფრო დააშორა ევროკავშირს, რითაც სერიოზული საფრთხე შეუქმნა საქართველოს ათწლეულების მანძილზე გერმანიასთან პარტნიორობას. შედეგად, ჩვენ შევამცირეთ ჩვენი თანამშრომლობა ქვეყნის ხელისუფლებასთან და შევაჩერეთ 200 მილიონ ევროზე მეტი ღირებულების მხარდაჭერის პროექტები. ამავდროულად, ჩვენ კონსულტაციებს ვაწარმოებთ ევროკავშირის პარტნიორებთან შემდგომი ზომების შესახებ, საქართველოს ოფიციალური პირებისთვის უვიზო მიმოსვლის გაუქმებიდან დაწყებული მიზანმიმართულ სანქციებამდე.

ბურთი ქართული ოცნების პასუხისმგებელი პირების მოედანზეა. ახლა მათზეა დამოკიდებული, რომ ყველაფერი გააკეთონ ღრმა პოლიტიკური კრიზისის დასასრულებლად, ნდობის აღსადგენად და ქართველ ხალხს შესთავაზონ რეალური პერსპექტივა - ევროკავშირში გაწევრიანების გზაზე დაბრუნებისთვის, მაგრამ უპირველეს ყოვლისა, ყველა ქართველისთვის კარგი მომავლისთვის", — წერს ბერბოკი.