გაერთიანებული პროფკავშირების შენობის შესასვლელში მომხდარი დაპირისპირების შედეგად სამი ახალგაზრდა დაშავდა. ისინი კლინიკაში არიან გადაყვანილი.

აგრომეურნეობის, ვაჭრობისა და მრეწველობის პროფკავშირის, "ლაბორის", წევრები რადიო თავისუფლებას უყვებიან, რომ მათ გაერთიანებული პროფკავშირების მიერ დაქირავებული დაცვის წევრები ფიზიკურად გაუსწორდნენ.

გამოცემის ინფორმაციით, ფიზიკური და სიტყვიერი დაპირისპირება მოჰყვა იმ ფაქტს, რომ გამგეობის სხდომაზე Labor-ის წევრები არ შეუშვეს.

"კარში ჩადგნენ ჩვენთვის გაურკვეველი პირები, ალბათ დაქირავებული დაცვა, რომლებმაც იძალადეს "ლაბორის" წევრებზე. დაიწყეს კარის მიხურვა. ამას მოჰყვა დაპირისპირება.
ამ ე.წ. დაცვის წარმომადგენელმა მუშტი ჩაარტყა სახეში "ლაბორის" ერთ-ერთ წევრს, ასევე მეორე წევრს ჩაარტყეს მუშტი სახეში და ჩაუმტვრიეს კბილი. მესამე დაზარალებულია გოგო, რომელსაც ხელები და ფეხები აქვს დაბეჟილი. სამივე დაზარალებული კლინიკაშია გადაყვანილი". — აცხადებს "ლაბორის" იურისტი თამილა გაბაიძე.

გაერთიანებული პროფკავშირების თავმჯდომარის მოადგილე რაისა ლიპარტელიანი რადიო თავისუფლებას ეუბნება, რომ "ლაბორის" თავმჯდომარეს, გიორგი დიასამიძეს, თავად არ მოუთხოვია იურისტის დასწრება სხდომაზე და შესაბამისად, მათ არ დაუყენებიათ დღის წესრიგში გამგეობის სხდომაზე იურისტის დასწრების საკითხი.

რაისა ლიპარტელიანი ამბობს, რომ გაფიცულებს კითხვის ნიშნები და პრეტენზიები აქვთ "ლაბორთან", პროფკავშირთან, რომელიც მათ ინტერესებს სათანადოდ არ იცავს.

გაერთიანებული პროფკავშირების შენობაში მიმდინარე გამგეობის სხდომას "ევოლუშენ საქართველოს" 20-მდე გაფიცული თანამშრომელი დაესწრო. მათ შორის იყო გვანცა სუბელიანი, რომელსაც "ლაბორისა" და მისი ხელმძღვანელის მიმართ არაერთი პრეტენზია აქვს:

"ჩვენ ვედავებით "ლაბორს" ჩვენთან შეუთანხმებლად გადაწყვეტილებების მიღებაში, რამაც სავალალო შედეგები მოგვიტანა. მათ შორის ის, რომ ჩვენ გვაქვს ახლა სამართლებრივი დავა "ევოლუშენთან", რომელიც გვთხოვს ფინანსურ კომპენსაციას. "ლაბორი" ამ პროცესებს მართავდა არასწორად", — ამბობს გვანცა სუბელიანი.

უკვე ექვსი თვეა, რაც კომპანია "ევოლუშენ საქართველოს" თანამშრომელთა ნაწილი გაფიცულია. ისინი ითხოვენ ხელფასების მომატებას და შრომის პირობების გაუმჯობესებას.

შინაგან საქმეთა სამინისტრო ჯერჯერობით კომენტარს არ აკეთებს, დაიწყო თუ არა მომხდარ ფაქტთან დაკავშირებით გამოძიება.