ეკოციდიდან 9 წლის შემდეგ, ქართველმა აქტივისტებმა ბორჯომის ტყის სრულად აღსადგენად მასშტაბური კამპანია დაიწყეს, რომელიც ბუნებრივი საფარის აღსადგენად საზოგადოებისა და ბიზნესის წარმომადგენლების გაერთიანებას ითვალისწინებს.

კამპანიის ფარგლებში თითქმის მილიონი (750 000) ხის დარგვა იგეგმება. მისი ინიციატორია ბიზნეს ინფორმაციის სააგენტო (ბია) და ხორციელდება თრიფექსის (Treepex) ტექნოლოგიური უზრუნველყოფით. დაგეგმილი პროექტისთვის შეიქმნა ვებგვერდი agadgine.ge.

ბორჯომის ეროვნული პარკის ტერიტორიაზე 2008 წელს, რუსეთის მიერ გაჩენილი ხანძრის შედეგად, 250–მდე ჰექტარზე ტყის საფარი მთლიანად განადგურდა. ტყეს ცეცხლი რამდენიმე კვირის განმავლობაში ეკიდა. განადგურებული საფარი, კლასიფიკაციის მიხედვით, განეკუთვნებოდა უნიკალურ, განსაკუთრებული ფუნქციური დანიშნულების ტყეს, რომლის არსებობა განაპირობებს რეგიონში ეკოლოგიური წონასწორობის შენარჩუნებას.

ბორჯომის ტყის მდგომარეობა შეფასდა, როგორც ეკოლოგიური კატასტროფა.

წლების შემდეგ, ეკოლოგიური მდგომარეობა რეგიონში კიდევ უფრო დამძიმებულია. ვერ ხერხდება დაზიანებული უბნების ბუნებრივი განახლება, დამძიმებულია ეროზიული ფონი. ტერიტორიაზე საერთაშორისო და ადგილობრივი ექსპერტების მიერ ჩატარებული კვლევების შედეგად, მდგომარეობა შეფასდა როგორც ეკოლოგიური კატასტროფა. კვლევების მიხედვით, ტყის აღდგენის პროცესში ჩარევის გარეშე, ის ვეღარასდროს დაუბრუნდება პირვანდელ სახეს.

ბორჯომის ტყის ტერიტორიაზე ხის დარგვა ნებისმიერ მსურველს კამპანიისთვის სპეციალურად შექმნილი ვებგვერდის საშუალებით შეუძლია.

ვებგვერდზე agadgine.ge მომხმარებელი თავად ირჩევს რამდენი ხის დარგვა სურს. ხის დარგვა შესაძლებელია როგორც კომპანიის, ისე ფიზიკური პირის სახელით.

კამპანიის ფარგლებში, მომხმარებელს საშუალება აქვს თვალი ადევნოს პროცესს და ყოველდღიურად ვებგვერდზე გადაამოწმოს, რამდენი ხე დაირგო და რამდენი დარჩა ტყის სრულად აღსადგენად.

ტყის აღდგენის პროცესში ჩარევის გარეშე, ის ვეღარასდროს დაუბრუნდება პირვანდელ სახეს.

ბორჯომის ეროვნული პარკი ერთ-ერთი უდიდესი პარკია ევროპაში. ტერიტორია ყოველთვის გამოირჩეოდა იშვიათი სახეობის ხეებით და უნიკალური მცენარეებით. პარკის ტერიტორიაზე ბინადრობს წითელ ნუსხაში შესული ცხოველების 8 სახეობა.

2008 წლის ომის დროს, ბორჯომის ხეობაში, ხაიშში, ატენის ხეობასა და გორის მიმდებარე ტერიტორიაზე მთლიანად 1 100 ჰექტარი ტყის მასივი განადგურდა.

გარემოს და ბუნებრივი რესურსების დაცვის სამინისტროს ინფორმაციით, საომარი მოქმედებების დროს საქართველოს ბუნებას მილიარდ ლარზე მეტი ზიანი მიადგა. ბუნებაში დატოვებული რუსული კვალის აღმოფხვრას და ომამდე არსებული მდგომარეობის დაბრუნებას ათეულობით წელი დასჭირდება.