ოსკარის დაჯილდოება კინოსამყაროს ყველაზე მნიშვნელოვანი მოვლენაა, ამიტომ ბუნებრივია, საზოგადოებაში არსებობს მოლოდინი იმისა, რომ მისი ორგანიზატორები და მონაწილეები მსოფლიოში მიმდინარე ყველაზე მნიშვნელოვან თემებს რაიმე ფორმით გამოეხმაურებიან. წელს ასეთი საკითხი უკრაინაში რუსეთის შეჭრა და სრულმასშტაბიანი ომია, რომელიც თვეზე მეტია მიმდინარეობს და რომელსაც ყოველდღიურად უამრავი უკრაინელის სიცოცხლე ეწირება.

საზოგადოების მოლოდინი ოსკარის წინ რამდენიმე ვარსკვლავის განცხადებამ კიდევ უფრო გაამძაფრა. მაგალითად, ცერემონიის თანაწამყვანმა ემი შუმერმა გამოთქვა სურვილი, ოსკარის დაჯილდოებაზე უკრაინის პრეზიდენტი ვოლოდიმირ ზელენსკი მიეწვიათ, რათა მას მსოფლიოსთვის მიემართა. შონ პენმა კი განაცხადა, რომ თუ ზელენსკის არ მიიწვევდნენ, საკუთარ ოსკარებს გადაადნობდა.

ოსკარის რიგით 94-ე დაჯილდოებამ ზელენსკის გარეშე ჩაიარა. საზოგადოების დიდი ნაწილის აზრით, ცერემონიის ორგანიზატორებმა და ვარსკვლავებმა საკმარისი ყურადღება და დრო არ დაუთმეს უკრაინაში მიმდინარე მოვლენებს, რამაც მაყურებელთა უკმაყოფილება გამოიწვია.

უნდა აღინიშნოს, რომ წლევანდელ ოსკარს უკრაინის ხსენების გარეშე ნამდვილად არ ჩაუვლია. ამ სტატიაში კი უფრო დეტალურად მოგიყვებით, თუ როგორ გამოეხმაურნენ წლის ერთ-ერთ მნიშვნელოვან ღონისძიებაზე უკრაინაში მიმდინარე ომს:

1. წუთიერი დუმილი და უკრაინის შესახებ კინოაკადემიის განცხადება

ოსკარის ცერემონიის ორგანიზატორებმა და დამსწრე საზოგადოებამ უკრაინისადმი სოლიდარობა წუთიერი დუმილით გამოხატეს. ცერემონიიის დროს ეკრანზე შემდეგი ტექსტი გამოჩნდა: "გვსურს, რომ წუთიერი დუმილით უკრაინელი ხალხის მიმართ ჩვენი მხარდაჭერა გამოვხატოთ. მიუხედავად იმისა, რომ კონფლიქტისას ჩვენი ჰუმანურობის გამოსახატად ფილმი ერთ-ერთი მნიშვნელოვანი გზაა, რეალობა ის არის, რომ მილიონობით უკრაინელ ოჯახს საკვები, სამედიცინო დახმარება და სუფთა წყალი სჭირდება. ჩვენ, როგორც გლობალური საზოგადოების წევრებს, ერთად მეტის გაკეთება შეგვიძლია. გთხოვთ, როგორც შეგიძლიათ გვერდში დაუდგეთ უკრაინას, #StandWithUkraine".

2. მილა კუნისმა უკრაინელ ხალხს გამძლეობა შეუქო

წარმოშობით უკრაინელმა მსახიობმა ცერემონიაზე უკრაინელი ხალხის შეუპოვრობასა და გამძლეობაზე ისაუბრა:

"ასეთ საშინელ დროს შეუძლებელია, რომ უკრაინელი ხალხის გამძლეობამ არ გაგაოცოს. ისინი ამ წარმოუდგენელ სიბნელეშიც კი ძალას პოულობენ და ბრძოლას აგრძელებენ", — ასე დაახასიათა მილა კუნისმა უკრაინელი ხალხი.

აღსანიშნავია, რომ მილამ და მისმა ქმარმა, ეშტონ კაჩერმა, უკრაინისთვის $30 მილიონზე მეტი შეაგროვეს და მათ ზელენსკიმ მადლობა პირადადაც გადაუხადა.

3. ემი შუმერის მოკლე კომენტარი "უკრაინელი ხალხის გენოციდის" შესახებ

კრისტენ დანსტის შესახებ ხუმრობის შემდეგ ემი შუმერმა უკრაინელი ხალხის გენოციდი ახსენა, შემდეგ კი საზოგადოებას ენტონი ჰოპკინსი წარუდგინა:

"და უკრაინაში ქალებისა და ტრანსგენდერი ადამიანების გენოციდი მიმდინარეობს და მათი უფლებები ილახება. ახლა კი გთხოვთ, მივესალმოთ ენტონი ჰოპკინსს..."

4. ვარსკვლავების ნაწილმა უკრაინისადმი მხარდაჭერა აქსესუარებით გამოხატა

რამდენიმე ვარსკვლავი, მაგალითად, ჯეიმი ლი კერტისი გაეროს ლტოლვილთა უმაღლესი კომისარიატის ლურჯი გულსაბნევით გამოჩნდა, რომლითაც უკრაინელ ლტოლვილებს მხარდაჭერა გამოუცხადა. ბენედიქტ კამბერბეჩს უკრაინის დროშის ფერებიანი გულსაბნევი ეკეთა, ჯეისონ მომოას კი კოსტიუმის ჯიბეში ლურჯი და ყვითელი ქსოვილებისგან დამზადებული ცხვირსახოცი ედო.

ფაქტია, რომ წლევანდელ ოსკარის ცერემონიაზე უკრაინის მხარდამჭერი განცხადებების, ინიციატივებისა თუ მოწოდებების ნაკლებობას ნამდვილად უჩიოდა. უკრაინაში მიმდინარე ომის ნაცვლად კი მსოფლიოს ყურადღების ცენტრში უილ სმიტსა და კრის როკს შორის მომხდარი ინციდენტი აღმოჩნდა, რამაც საზოგადოების დიდ ნაწილს იმედი გაუცრუა.

ამავე თემაზე:

• ვოლოდიმირ ზელენსკი 2022 წლის ოსკარის დაჯილდოების ცერემონიაზე მიიწვიეს
• ჩემს ოსკარებს გადავადნობ, თუ ზელენსკის დაჯილდოებაზე არ ჩართავენ — შონ პენი
• ოსკარი 2022-ზე უკრაინისადმი სოლიდარობა წუთიერი დუმილით გამოხატეს