ამერიკელმა მსახიობმა, ემი შუმერმა, რომელიც 2022 წლის ოსკარის დაჯილდოების ერთ-ერთი წამყვანია, ვოლოდიმირ ზელენსკი ცერემონიაზე მიიწვია. ამის შესახებ ინფორმაციას უკრაინული გამოცემა UNIAN ავრცელებს.

ემი შუმერმა ოსკარის დაჯილდოების შესახებ დრიუ ბერიმორის შოუში ისაუბრა და დასძინა, რომ ცერემონია კარგი შესაძლებლობა იქნება ზელენსკისთვის, რათა მილიონობით ამერიკელს უკრაინაში მიმდინარე ომის შესახებ უამბოს.

ფოტო: Getty Images

"მართალია, ოსკარის დაჯილდოების ცერემონიაზე ხალხს ყველაფრის დავიწყება და განტვირთვა სურს, მაგრამ საკმაოდ დიდ ზეწოლას ვგრძნობ, როცა ირგვლივ ამდენი საშინელება ხდება. ვფიქრობ, რომ ეს ცერემონია რიგ საკითხებზე კომენტარის გასაკეთებლად კარგი საშუალებაა. მეც მაქვს რამდენიმე სიტყვა მომზადებული, რომელიც მსოფლიოში მიმდინარე პროცესებს ხაზს უსვამს, თუმცა ომის გათვალისწინებით, შოუზე ფოკუსირება ძალიან რთულია", — განაცხადა ემი შუმერმა.

შეგახსენებთ, რომ ოსკარის რიგით 94-ე დაჯილდოება 27 მარტს გაიმართება, რომელსაც ემი შუმერი, რეჯინა ჰოლი და უანდა საიკსი გაუძღვებიან.