ჰოლივუდის სახელოვანმა მსახიობმა შონ პენიმ ამერიკის კინოაკადემიას ულტიმატუმი საჯაროდ წაუყენა: თუ წლევანდელ ოსკარებზე უკრაინის პრეზიდენტს, ვოლოდიმირ ზელენსკის სიტყვით გამოსვლის უფლებას არ მისცემენ, მაშინ ის აკადემიის მიერ წარსულში მინიჭებულ ჯილდოებს გადაადნობს.

CNN-თან საუბრისას მსახიობმა განაცხადა, რომ "კინოაკადემია ვერაფერს გააკეთებს იმაზე კარგს, თუ ზელენსკის უფლებას მისცემს, ყველა ჩვენგანს დაჯილდოებაზე მოგვმართოს".

"თუ აკადემია გადაწყვეტს, რომ არ დაუკავშირდეს უკრაინის ხელისუფლებას, რომელსაც ჩვენ ნაცვლად ხვდება ბომბები და ტყვიები, მათ შორის იმ უკრაინელ ბავშვებს, რომელთა დაცვასაც ასევე ცდილობენ, მაშინ მთელი ეს გადაწყვეტილება და მისი მიმღები თითოეული ადამიანი ყველაზე ამორალური ნაწილი იქნება ჰოლივუდის მთელი ისტორიისა", — დაამატა მან.

შონ პენის თქმით, თუ სცენარი ასე განვითარდება, მაშინ ყველამ ბოიკოტი უნდა გამოუცხადოს კინოაკადემიას: მაგალითად, თავად წარსულში მიღებულ ორ ოსკარს საჯაროდ გადაადნობს. შონ პენმა პირველი ოსკარი 2003 წელს მიიღო ფილმისთვის Mystic River და მეორედ 2008-ში ფილმით Milk.

რამდენიმე დღის წინ წლევანდელი ოსკარების ერთ-ერთმა თანაწამყვანმა, ემი შუმერმა, განაცხადა, რომ დაჯილდოებაზე ვოლოდიმირ ზელენსკის ჩართვა კარგი იქნებოდა, თუმცა საბოლოო გადაწყვეტილების მიღება მას არ შეუძლია.

რაც შეეხება შონ პენს, ის უკრაინაში რუსეთის შეჭრის დღიდან დოკუმენტურ ფილმს იღებს ამ მოვლენებზე და ამჟამად პოლონეთში უკრაინელი ლტოლვილების ცხოვრებას აკვირდება.

ოსკარების წლევანდელი, 94-ე დაჯილდოების ცერემონია თბილისის დროით 28 მარტს, დილის 5 საათზე დაიწყება.

ასევე იხილეთ: