"შემოთავაზებულ მოდელში ბლოკების შექმნის აკრძალვით და ამ ფონზე 5%-იანი ბარიერის შენარჩუნებით, გამარჯვებული პარტიის მიერ გადაუნაწილებელი ხმების სრულიად უსამართლო მითვისებით, რეალურად ყალიბდება არაკონკურენტული საარჩევნო სისტემა, რაც მომავალში მრავალპარტიული პარლამენტის შექმნის შესაძლებლობას კრიტიკულად ამცირებს, ხალხის განწყობის პროპორციულად ასახვას არ უზრუნველყოფს, საბოლოოდ კი, ქვეყანა ყალიბდება ფსევდო საპარალამენტო რესპუბლიკად, სადაც იმის ნაცვლად, რომ პარტიები და პარლამენტი იყოს ძლიერი, ორივე შესუსტებულია," - ამის შესახებ დღეს გამართულ ბრიფინგზე პრეზიდენტის პრესსპიკერმა ეკა მიშველაძემ განაცხადა.

პრეზიდენტის აზრით, კონსტიტუციის ახალი ვერსია არ უწყობს ხელს ხელისუფლების შტოებს შორის ბალანსისა და გაწონასწორების პოლიტიკას.

მიშველაძის თქმით, პრეზიდენტის უფლებების შეკვეცა უარყოფითად აისახება ქვეყნის უსაფრთხოებასა და თავდაცვისუნარიანობაზე. უშიშროების საბჭოს გაუქმებით, კი ვიღებთ შესუსტებულ თავდაცვასა და უფუნქციო უმაღლეს მთავარსარდალს.

პრეზიდენტის აზრით, კონსტიტუციის ახალ ვერსიაში, უზენაესი სასამართლოს მოსამართლეების წარდგენის წესის შეცვლითა და მოსამართლეთა გამოსაცდელი ვადის შენარჩუნებით, უარესდება სასამართლოს დამოუკიდებლობის ხარისხი.

"ეს არის კონსტიტუციის გადასინჯვის პროექტში არსებული პრობლემური საკითხების არასრული ჩამონათვალი. შემოთავაზებულ ვერსიაში არის კიდევ თემები, რომელიც საჭიროებს შესწავლასა და ანალიზს. თუმცა, ასევე აღსანიშნავია, რომ ცალკეულ საკითხებთან მიმართებაში, კონსტიტუციის ამ ვერსიაში გაჩნდა დადებითი ჩანაწერებიც," - აღნიშნა მარგველაშვილის პრესსპიკერმა.

სახელმწიფო საკონსტიტუციო კომისიამ ახალი კონსტიტუციის პროექტს 43 ხმით, რვის წინააღმდეგ მხარი დაუჭირა. არასამთავრობო ორგანიზაციების განცხადებით, ქართულმა ოცნებამ მხოლოდ ის რეკომენდაციები გაითვალისწინა, რაც პარტიისთვის პრინციპული მნიშვნელობის არ იყო.