ინგლისსა და უელსში ახალი კანონპროექტის ფარგლებში, რომელიც კიბერუსაფრთხოებას ეხება, უცხო ადამიანისთვის შიშველი ფოტოების გაგზავნა აიკრძალება. ამის ერთ-ერთი მიზეზი 2020 წლის კვლევაა, რომლის მიხედვითაც, 12-18 წლის გოგონების 75%-ს უცნობი ბიჭები და კაცები თავიანთ შიშველ ფოტოებს უგზავნიან.

ე.წ. Cyberflashing, რომელიც ინტერნეტით უცხო ადამიანისთვის უცენზურო ფოტოების გაგზავნას გულისხმობს, ახალი კანონპროექტის მიხედვით, სისხლის სამართლის დანაშაულად იქცევა, რომელიც ორი წლით პატიმრობით დაისჯება.

"უცნობი ადამიანებისთვის შიშველი და უცენზურო ფოტოების გაგზავნის სტატისტიკა შემაშფოთებლად მზარდია. ახალი კანონის მიზანია, რომ დღეისთვის არსებული ხარვეზები გამოასწოროს და მსგავსი ტიპის ქმედებები სერიოზული სახის დანაშაულად განიხილოს", — ამბობს იურისტი პენი ლუისი.

ახალი კანონპროექტის მიხედვით, სოციალურ მედიასთან დაკავშირებით სხვა ცვლილებებიც იგეგმება. მაგალითად, სამართალდარღვევად ჩაითვლება სოციალურ მედიაში მუქარის შემცველი პოსტების გამოქვეყნება. გარდა ამისა, კანონპროექტით შემოთავაზებულია შემდეგი კანონდარღვევებიც: ადამიანისთვის მიზანმიმართულად იმ ტიპის შეტყობინების გაგზავნა, რომელიც მას ემოციურ და ფსიქოლოგიურ ზიანს აყენებს და მიზანმიმართულად ცრუ ინფორმაციის შემცველი შეტყობინების გაგზავნა, რომელიც ასევე სერიოზულ ზიანს იწვევს.

ახალი კანონპროექტი სხვადასხვა ონლაინ პლატფორმისგან მოითხოვს, რომ მომხმარებლები თაღლითური რეკლამებისგან დაიცვან. კანონპროექტის დამტკიცების შემთხვევაში, კომუნიკაციების მარეგულირებელ კომისიას იმ კომპანიების დაჯარიმების უფლება ექნება, რომლებიც კანონს დაარღვევენ.