დე ფაქტო აფხაზეთის საგარეო საქმეთა სამინისტრო ქართველ პოლიტიკოსებს მოუწოდებს, "შეწყვიტონ საკუთარი თავისა და საერთაშორისო საზოგადოების მოტყუება." სამინისტრო ამ განცხადებით რუსეთის საგარეო საქმეთა მინისტრის, სერგეი ლავროვის აფხაზეთში ვიზიტს გამოეხმაურა.

განცხადების თანახმად, სერგეი ლავროვის ვიზიტის არაკანონიერებასა და საქართველოს ტერიტორიული მთლიანობის დარღვევაზე, ქართველი ოფიციალური პირების "ბრაზიანი" განცხადებები გახშირდა:

"აღნიშნული სამუშაო ვიზიტი სრულად პასუხობს რუსეთ-აფხაზეთის ურთიერთობებსა და შეესაბამება საერთაშორისო სამართალს. შეგახსენებთ, რომ აფხაზეთსა და რუსეთს შორის დიპლომატიური ურთიერთობები 2008 წლის 9 სექტემერს დამყარდა."

სერგეი ლავროვის ვიზიტი აფხაზეთში დღეს, 18 აპრილსაა ჩანიშნული.

საქართველოს საგარეო საქმეთა სამინისტრომ ლავროვის ვიზიტს ოკუპირებულ აფხაზეთში პროვოკაციული პოლიტიკის გაგრძელება უწოდა. ვიზიტს გამოეხმაურა საქართველოს პრეზიდენტიც და საერთაშორისო თანამეგობრობას მოუწოდა, დაგმოს აფხაზეთში ლავროვის ვიზიტი.