რუსეთის მიერ ომის დაწყების შემდეგ, პენტაგონი ევროპაში დამატებით 7 000 სამხედროს გზავნის. აშშ-ის თავდაცვის მდივანმა, ლოიდ ოსტინმა ჯარისკაცების გერმანიაში წასვლასთან დაკავშირებით ბრძანება უკვე გასცა.

NYT-ის ცნობით, ამით რუსეთის აგრესიის ზრდის პერიოდში აშშ-ის პრეზიდენტის, ჯო ბაიდენის მიერ გაგზავნილი სამხედროების რაოდენობა 14 000-ს მიაღწევს.

დღეს ბაიდენმა რუსეთის 4 მსხვილ, მათ შორის, VTB ბანკს სანქციები დაუწესა — რუსეთს გაეყინება ყველა აქტივი, რაც აშშ-ში აქვს. მისი თქმით, ბანკები, რომლებსაც სანქციები დაუწესეს, ჯამში 1 ტრილიონი დოლარის აქტივებს ფლობენ. ამასთან, აშშ სანქციებს უწესებს კრემლის ელიტასა და მათი ოჯახის წევრებს.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. უკრაინული მედიისა და სახელმწიფო სტრუქტურების ინფორმაციით, თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევში. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა და მოუწოდა ხალხს, არ აჰყვნენ პანიკას.

ბოლო ინფორმაციით, რუსეთის თავდასხმის შედეგად 57 უკრაინელი გარდაიცვალა, 169 დაიჭრა. ინფორმაცია უკრაინის ჯანდაცვის მინისტრმა გაავრცელა და განაცხადა, რომ რუსები საავადმყოფოებს ბომბავენ.

გარდა ამისა, CNN ადგილზე მყოფ ჟურნალისტზე დაყრდნობით წერს, რომ რუსულმა საჰაერო-სადესანტო ძალებმა კიევთან ახლოს მდებარე ანტონოვის აეროპორტზე კონტროლი აიღეს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი: