უკრაინის სასაზღვრო დაცვის სამსახურის ინფორმაციით, რუსული ჯავშანტექნიკა კიევის რეგიონში შეიჭრა. მათი ცნობით, მოწინააღმდეგემ საზღვარი "ვილჩას" საგუშაგოდან გაარღვია. სტრატეგიული კომუნიკაციებისა და ინფორმაციების უსაფრთხოების ცენტრის ცნობით, კიევის შესასვლელთან მონტაჟდება დამცავი კონსტრუქციები.

"კიევის შესასვლელებთან, საგუშაგოებთან ვაპირებთ დამცავი კონსტრუქციების დადგმას, ამიტომ შესვლა შეიძლება გართულდეს. გთხოვთ, ამას გაგებით მოეკიდოთ და გთხოვთ, ჩვენი სამხედროებისა და თვითმფრინავების გადაადგილების შესახებ არ გაავრცელოთ ინფორმაცია", — წერია განცხადებაში.

უკრაინის საგანგებო სიტუაციების სამინისტრო წერს, რომ კიევის რეგიონში უკრაინის შეიარაღებული ძალების სამხედრო თვითმფრინავი ჩამოვარდა. არიან დაღუპულები, თუმცა ამ ეტაპზე მათი ზუსტი რაოდენობა ზუსტდება. უწყების ცნობით, ბორტზე 14 ადამიანი იმყოფებოდა.

ამასთან, საგანგებოს ბოლო ცნობებით, თავდასხმა განხორციელდა ჟიტომირის სამხედრო აეროპორტშიც. ადგილზე 11 სამაშველო და 2 სახელმწიფო სახანძრო-სამაშველო ჯგუფი იყო მობილიზებული. მათი ცნობით, იწვოდა Su-27 თვითმფრინავი და საწვავის მანქანა. ამ დროისთვის ხანძარი ლიკვიდირებულია.

უკრაინის შეიარაღებული ძალების გენერალური შტაბი კი წერს, რომ ამ დროისთვის უკრაინის სამოქალაქო და სამხედრო ინფრასტრუქტურის ობიექტებს ოკუპანტებმა კალიბრის საკრუიზო რაკეტებით, MLRS-ითა და არტილერიით 30-ზე მეტი დარტყმა მიაყენეს.

"მოწინააღმდეგე საავიაციო ჯარის დახმარებით აგრძელებს უკრაინის საზღვრების გადმოკვეთას ხერსონისა და კახოვკას მიმართულებით. აღინიშნება დივერსიული სადაზვერვო ჯგუფების მოქმედება ბესარაბიისა და შავი ზღვის საოპერაციო ზონებში", — ვკითხულობთ განცხადებაში.

ამასთან, მათივე ცნობით, ერთ-ერთ სოფელთან უკრაინის შეიარაღებულმა ძალებმა დამატებით ორი რუსული თვითმფრინავი ჩამოაგდეს.

უკრაინის თავდაცვის სამინისტროს განცხადებით კი, უკრაინელმა სამხედროებმა ორი რუსი ჯარისკაცი ტყვედ აიყვანეს. მათივე ინფორმაციით, ლუგანსკის რეგიონში უკრაინელებმა ერთი რუსული თვითმფრინავი ჩამოაგდეს. უწყება წერს, რომ ეს უკვე მე-7 რუსული თვითმფრინავია, რომელიც უკრაინამ ჩამოაგდო.

უკრაინის შსს-ის ინფორმაციით, ამ წუთებში საბრძოლო მოქმედებები მიმდინარეობს ლუგანსკის რეგიონში, სჩასტიასთან ახლოს. მათი თქმით, არის მსხვერპლი მოწინააღმდეგის მხარეს. შსს აცხადებს, რომ ხარკოვის მახლობლად შემოვლით გზაზე ოთხი რუსული ტანკი გაანადგურეს.

ამ დრომდე არცერთი უწყება ზუსტ ინფორმაციას გარდაცვლილთა და დაშავებულთა შესახებ არ ავრცელებს. თუმცა სხვადასხვა დროს იყო ცნობები მსხვერპლზე. უკრაინული შეიარაღებული ძალების გენერალური შტაბი 15:00 საათზე წერდა, რომ ქალაქ ხარკოვის შემოვლით გზაზე 4 ტანკი დაიწვა, განადგურდა 6 თვითმფრინავი, 2 ვერტმფრენი და დაიღუპა 50-მდე რუსი სამხედრო. რუსებმა ხარკოვის ოლქში დაბომბეს საცხოვრებელი კორპუსიც, რასაც არასრულწლოვანის სიცოცხლე ემსხვერპლა.

გაიგეთ მეტი: