პრემიერმინისტრ ირაკლი ღარიბაშვილის განცხადებით, მიუნხენის უსაფრთხოების კონფერენციაზე კიდევ ერთხელ დაადასტურეს მტკიცე მხარდაჭერა უკრაინის მიმართ და იმსჯელეს ვითარების განმუხტვის გზებზე. მისივე თქმით, ვიზიტი ნაყოიერი იყო.

"ნაყოფიერი ვიზიტი მქონდა მიუნხენში, უსაფრთხოების 58-ე კონფერენციაზე, სადაც პირადად კონფერენციის თავმჯდომარის, ვოლფგანგ იშინგერის მიწვევით ვიმყოფებოდი. შეხვედრები გავმართე, როგორც პოლიტიკურ ლიდერებთან, ასევე ბიზნესწრეების წარმომადგენლებთან და უმსხვილესი კომპანიების პირველ პირებთან. ჩვენთვის პრიორიტეტული იყო მიუნხენის უსაფრთხოების კონფერენციის პლატფორმის გამოყენება ჩვენი ევროპული და ევროატლანტიკური მისწრაფებების კიდევ ერთხელ ხაზგასასმელად.

უსაფრთხოების კუთხით არსებული გამოწვევების ფონზე, კიდევ ერთხელ დავადასტურეთ მტკიცე მხარდაჭერა ჩვენი უკრაინელი მეგობრებისადმი, ასევე ვიმსჯელეთ ვითარების განმუხტვის გზებზე ჩვენს საერთაშორისო პარტნიორებთან", — ამბობს ის.

საგარეო საქმეთა მინისტრის, დავით ზალკალიანის განცხადებით, მიუხედავად იმისა, რომ მიუნხენის უსაფრთხოების კონფერენციაზე მთავარი თემა უკრაინა იყო, საქართველოს წარმომადგენლების იქ ყოფნა მნიშვნელოვანია უკრაინელი კოლეგებისა და საერთაშორისო თანამეგობრობისთვის. მანვე აღნიშნა, რომ მიუნხენის უსაფრთხოების კონფერენციის ფარგლებში პრემიერმინისტრმა მნიშვნელოვანი შეხვედრები გამართა ეკონომიკური მიმართულებით.