შინაგან საქმეთა სამინისტროს ინფორმაციით, თაღლითობის ბრალდებით, დანაშაულებრივი ჯგუფის 6 წევრი დააკავეს, რომელთა ქმედებამ მილიონ ლარამდე ზიანი გამოიწვია. უწყების ცნობით, მათ 2022 წლის დასაწყისში ერთ-ერთი ბანკის თანხის დაუფლება დაგეგმეს.

"განზრახვის აღსრულებისთვის, შ.ბ-მ, რომელიც ერთ-ერთი კომპანიის დირექტორია, ფინანსურ ინსტიტუტს მიმართა და პოს-ტერმინალის დადგმა მოითხოვა. მას შემდეგ, რაც შ.ბ-მ პოს-ტერმინალი მიიღო, დანაშაულებრივი ჯგუფის წევრებმა, უკანონო მანიპულაციების შედეგად, მასზე გაააქტიურეს ე.წ. პრეავტორიზაციის ფუნქცია", — ნათქვამია ინფორმაციაში.

შსს-ში ამბობენ, რომ 27 იანვრიდან 31 იანვრის ჩათვლით, უცხოეთში რეგისტრირებული ბანკის 2 ბარათით, რომლებზეც შესაბამისი თანხა არ იყო, დანაშაულებრივი ჯგუფის წევრებმა პოს-ტერმინალით 16-ჯერ, ჯამში, 2 314 890 ლარი გადაიხადეს, რის შემდეგაც, თანხა საკუთარ ანგარიშებზე გადარიცხეს და გაანაღდეს. უწყების ცნობით, დანაშაულმა 975 530 ლარის მატერიალური ზიანი გამოიწვია. დანაშაულები 6-დან 9 წლამდე ვადით თავისუფლების აღკვეთას ითვალისწინებს.

გარდა ამისა, პოლიციამ შ.ბ-ის მანქანის ჩხრეკისას ცეცხსასროლი იარაღი, მჭიდი და 12 ვაზნა ამოიღო, კომპანიის ოფისიდან კი პოს-ტერმინალი, რომლითაც მათ დანაშაული ჩაიდინეს. უწყებაში აღნიშნავენ იმასაც, რომ ბრალდებულების მანქანებიდან და ბინებიდან, ნივთმტკიცების სახით, პლასტიკური ბარათები, მობილური და კომპიუტერული მოწყობილობებია ამოღებული.

გამოძიება სისხლის სამართლის კოდექსის 236-ე მუხლის მე-4 ნაწილით, 180-ე მუხლის მე-2 ნაწილის ა ქვეპუნქტით და ამავე მუხლის მე-3 ნაწილის ბ ქვეპუნქტით მიმდინარეობს, რაც ცეცხსასროლი იარაღის და საბრძოლო მასალის მართლსაწინააღმდეგო ტარების, ასევე, წინასწარი შეთანხმებით, ჯგუფის მიერ ჩადენილი თაღლითოვას გულისხმობს, რამაც დიდი ოდენობით მატერიალური ზიანი გამოიწვია.