თელიმიკოს მიერ მოსახლეობისთვის დარიცხული გადასახადების კანონიერების შესწავლის პროცესში ფინანსთა სამინისტროს საგამოძიებო სამსახურიც ჩაერთვება. ამის შესახებ პრემიერმინისტრმა, ირაკლი ღარიბაშვილმა განაცხადა.

"მივიღე გადაწყვეტილება და მინდა ვთხოვო, დავავალო ბატონ ლაშა ხუციშვილს, რომ თელმიკოს მიერ მოსახლეობისთვის დარიცხული თანხების სისწორის და კანონიერების შესწავლის პროცესში ჩაერთოს ფინანსთა სამინისტროს საგამოძიებო სამსახურიც და გონივრულ ვადებში წარმოადგინოს შემოწმების შედეგებიც. ჩვენ უნდა ვნახოთ, რეალურად, უსამართლობას ხომ არ ჰქონდა ადგილი, შეიძლება რამე დარღვევას ჰქონდა ადგილი, ტექნიკურს, მექანიკურს, არ ვიცი მე რასთან გვაქვს საქმე", — განაცხადა მან.

მისივე თქმით, დარღვევების აღმოჩენის შემთხვევაში მთავრობას "ძალიან მკაცრი რეაგირება" ექნება.

პირველ დეკემბერს საქართველოს ენერგეტიკისა და წყალმომარაგების მარეგულირებელი კომისია მრიცხველების აღრიცხვის სისტემების ადგილზე შესასწავლად თელასსა და თელმიკოში შევიდა. მათი, განცხადებით, დარღვევების აღმოჩენის შემთხვევაში კომპანიები დაჯარიმდებიან, ხოლო მოქალაქეებს ზედმეტობით დარიცხული თანხები უკან დაუბრუნდებათ.

იანვრის დასაწყისში მოქალაქეები სოციალურ ქსელში წერდნენ, რომ მათ არა მხოლოდ დენის გადასახადის ორი ქვითარი მიუვიდათ, არამედ გადასახადიც გაეზარდათ. 4 ნოემბერს საპასუხოდ, თელმიკოში განაცხადეს, რომ საახალწლო დღეებთან დაკავშირებით, 31 დეკემბერს, 1 და 2 იანვარს გამზადებული ქვითრები არ გაგზავნილა, შესაბამისად, აღნიშნული ქვითრები მომხმარებლებს 3 და 4 იანვარს გაუგზავნეს და ისინი დეკემბრის დარჩენილი დღეების ელექტროენერგიის ხარჯს ასახავდა.

კომპანიაში ამტკიცებდნენ იმასაც, რომ გავრცელებული ინფორმაცია 1 იანვრიდან ტარიფის გაზრდაზე სიმართლეს არ შეესაბამება და ელექტროენერგიის საფასური არ შეცვლილა.

სემეკის დირექტორმა, დავით ნარმანიამ 8 თებერვალს განცხადა, რომ ტარიფების ზრდა მოსალოდენლი არ არის.