NATO-ს გენერალური მდივნის, იენს სტოლტენბერგის განცხადებით, ალიანსი სამხედრო ძალების განთავსებას უკრაინაში რუსეთის შეჭრის შემთხვევაში არ გეგმავს. ამის შესახებ სტოლტენბერგმა BBC-სთან განაცხადა.

"ჩვენ არ ვგეგმავთ NATO-ს საბრძოლო ჯარების განთავსებას უკრაინაში. NATO-ს ჰყავს ტრენერები, მათ ვეხმარებით გაძლიერებაში, თავდაცვის მოდერნიზებაში... NATO-ს მოკავშირეები უზრუნველყოფენ აღჭურვილობას, იარაღს, როგორც დიდმა ბრიტანეთმა მიაწოდა ტანკსაწინააღმდეგო იარაღი. ასე რომ, ბევრ რამეს ვაკეთებთ უკრაინის შესაძლებლობების გასაძლიერებლად, რათა მან თავი დაიცვას, მაგრამ უკრაინა NATO-ს წევრი არ არის", — ამბობს ის.

უკრაინის საზღვრებთან სიტუაცია უფრო და უფრო იძაბება. 26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. ამის ფონზე რუსეთი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება.

გაიგე მეტი: