ლელოს ერთ-ერთი ლიდერის, ბადრი ჯაფარიძის განცხადებით, მას შემდეგ, რაც საქართველოში სასამართლოს ყველა ინსტანცია ამოიწურება, ისინი საქალაქოს დღევანდელ გადაწყვეტილებას სტრასბურგში გაასაჩივრებენ.

"ჩვენ ვასაჩივრებთ ამას სააპელაციო სასამართლოში, გავასაჩივრებთ უზენაეს სასამართლოში. ჩვენ არ ვეთანხმებით კატეგორიულად ამ გადაწყვეტილებას. უნდა ყოფილიყო სრული გამართლება, ამიტომ ჩვენ გავაგრძელებთ გასაჩივრებას მანამ, სანამ არ იქნება გადაწყვეტილება მიღებული, რომ საერთოდ არაფერი არ მომხდარა და არანაირი ნიშანწყალი იქ დანაშაულის არ არის.

თუ ის ძალაში დარჩა, ჩვენ გავასაჩივრებთ შემდგომ უკვე, როდესაც ამოიწურება აქ ყველა ინსტანცია, ჩვენ გავასაჩივრებთ აუცილებლად სტრასბურგშიც", — აცხადებს ჯაფარიძე ფორმულას ეთერში.

მოსამართლე გიორგი არევაძემ ე.წ. ფულის გათეთრების საქმის განაჩენი გამოაცხადა. მან ბადრი ჯაფარიძესა და მამუკა ხაზარაძეს ბრალდება თაღლითობის მუხლით გადაუკვალიფიცირა და თითოეულს 7 წლით თავისუფლების აღკვეთა მიუსაჯა, თუმცა დანაშაულის ხანდაზმულობის გამო ისინი სასჯელისგან გათავისუფლდნენ. ბრალი გადაუკვალიფიცირდა იგივე საქმეში ბრალდებულ ავთანდილ წერეთელსაც. მას პროკურატურა ფულის გათეთრებაში ამსრულებლობასა და თანამონაწილეობას ედავებოდა, თუმცა ხაზარაძე-ჯაფარიძისთვს ბრალის გადაკვალიფიცირების შემდეგ მოსამართლემ წერეთელი თაღლითობაში ამსრულებლისა და თანამონაწილობისთვის ცნო დამნაშავედ.

საქალაქო სასამართლოს მიერ გამოტანილ განაჩენს გაასაჩივრებენ მამუკა ხაზარაძე, ბადრი ჯაფარიძე და ავთანდილ წერეთელიც. ხაზარაძემ მის მიმართ გამოტანილი განაჩენის შეფასებისას სასამართლოს "ერთი კაცის მართლმსაჯულება" უწოდა.

მოსამართლის გადაწყვეტილებას გაასაჩივრებს პროკურატურაც. უწყების განცხადებით, სასამართლომ ბრალდების მხარის მიერ წარდგენილი მტკიცებულებები "სრულად გაიზიარა", თუმცა "არ დაეთანხმა" ბრალდების მხარის შეფასებას ჩადენილი დანაშაულის სამართლებრივ კვალიფიკაციაში.

ამავე თემაზე: