პარლამენტში ადამიანის უფლებათა კომიტეტის თავმჯდომარის, მიხეილ სარჯველაძის აზრით, სასამართლოს მიერ მიღებული გადაწყვეტილებით, ხაზარაძე-ჯაფარიძე-წერეთლის საქმის გარშემო არსებულ სპეკულაციებს, რომ პოლიტიკურ დევნას ჰქონდა ადგილი, "ყველანაირი საფუძველი გამოეცალა". დეპუტატის მტკიცებით, სასამართლომ დანაშაულის ფაქტი დაადასტურა, უბრალოდ თქვა, რომ მას სხვა სახელი ჰქვია.

"ფაქტის დადასტურების პრობლემა, ამ თვალსაზრისით, არ ყოფილა, ანუ ფაქტი, რომელიც ჩაითვალა, რომ არის დანაშაულებრივი, ამის დადასტურებას პრობლემა არ ჰქონია სასამართლოს განმავლობაში, სხდომის მიმდინარეობის დროს და განხილვების პროცესში. რაც შეეხება, შეფასებას, სამართლებრივს, რომ რა ჰქვია ამ დანაშაულს და ეს არის თაღლითობა, ფულის გათეთრება თუ კიდევ სხვა რამ, აი, ამასთან დაკავშირებით აღმოჩნდა განსხვავებული შეხედულებები. ოღონდ, დანაშაულია ორივე შემთხვევაშიო, მე ასე გავიგე.

[...] ერთი მიმდინარე სისხლის სამართლის საქმეა და პოლიტიკური სპეკულაციები იმის თაობაზე, რომ ეს არის პოლიტიკურად მოტივირებული საქმე, იმიტომ, რომ ოპონენტს გაუსწორდნენ და ა.შ. ამას დღეს გამოეცალა ყოველგვარი ნიადაგი, მიზეზიც აღარ აქვთ ამის სათქმელად", — განაცხადა მან.

მოსამართლე გიორგი არევაძემ ე.წ. ფულის გათეთრების საქმის განაჩენი გამოაცხადა. მან ბადრი ჯაფარიძესა და მამუკა ხაზარაძეს ბრალდება თაღლითობის მუხლით გადაუკვალიფიცირა და თითოეულს 7 წლით თავისუფლების აღკვეთა მიუსაჯა, თუმცა დანაშაულის ხანდაზმულობის გამო ისინი სასჯელისგან გათავისუფლდნენ. ბრალი გადაუკვალიფიცირდა იგივე საქმეში ბრალდებულ ავთანდილ წერეთელსაც. მას პროკურატურა ფულის გათეთრებაში ამსრულებლობასა და თანამონაწილეობას ედავებოდა, თუმცა ხაზარაძე-ჯაფარიძისთვს ბრალის გადაკვალიფიცირების შემდეგ მოსამართლემ წერეთელი თაღლითობაში ამსრულებლისა და თანამონაწილობისთვის ცნო დამნაშავედ.

საქალაქო სასამართლოს მიერ გამოტანილ განაჩენს გაასაჩივრებს პროკურატურა და ხაზარაძე-ჯაფარიძე-წერეთელიც. ხაზარაძემ მის მიმართ გამოტანილი განაჩენის შეფასებისას სასამართლოს "ერთი კაცის მართლმსაჯულება" უწოდა. პროკურატურა კი აცხადებს, რომ სასამართლომ ბრალდების მხარის მიერ წარდგენილი მტკიცებულებები "სრულად გაიზიარა", თუმცა "არ დაეთანხმა" ბრალდების მხარის შეფასებას ჩადენილი დანაშაულის სამართლებრივ კვალიფიკაციაში.