ექსპრეზიდენტის ადვოკატების განცხადებით, გორის ჰოსპიტლიდან მიხეილ სააკაშვილის გამოწერის დოკუმენტზე ხელს ექიმი, ჯეირანაშვილი აწერს. ნიკა გვარამია ვარაუდობს, რომ სააკაშვილის ყოფილმა მკურნალმა ექიმმა, ნინო გოგორიშვილმა ფორმა 100-ზე მეორეჯერ ხელმოწერაზე უარი თქვა და მის მიერ გაკეთებული განცხადებებიც სწორედ ამას უკავშირდება.

"30-ის ფორმა 100-სა და გამოწერას ხელს აწერს არა ქალბატონი გოგორიშვილი, როგორც ახლა უკვე ცხადი გახდა. უბრალოდ, როგორც ჩანს, მან მეორეჯერ ამის ხელმოწერაზე უარი თქვა, იმიტომ იყო ეს ყველა განცხადება გაკეთებული და აწერს ხელს ვინმე ჯეირანაშვილი. ეს არ ვიცი ვინ არის, სახელიც ვერ ამოვიკითხე. ეს კაცი აქ [რუსთავის ციხეში] იმყოფება ყალბი დიაგნოზით, ვითომ გამოჯანმრთელებული, სინამდვილეში გამოჯანმრთელებული არ არის, უარესად არის, ვიდრე აქედან წავიდა", — თქვა მან.

იმავეს ამბობს სააკაშვილის კიდევ ერთი ადვოკატი, ბექა ბასიალაია. მისი თქმით, 27 დეკემბრის ფორმა 100-ზე გოგორიშვილის, ხოლო 30 დეკემბრისაზე კი ჯეირანაშვილის ხელმოწერა ფიქსირდება. ბასილაიას განცხადებით, დაფიქსირებული სამედიცინო ჩვენებები რეალობას არ შეესაბამება და განსხვავდება როგორც სახელმწიფო სამედიცინო კონსილიუმის, ასევე, ცენტრ ემპათიის მიერ გაკეთებული დასკვნებისაგან.

"ეს არის ლაკმუსის ქაღალდი, იმის დამადასტურებელი, რომ გორის სამხედრო ჰოსპიტალში მიღებული გადაწყვეტილებები გაწერის თაობაზე, ეს არის, რა თქმა უნდა, არა სამედიცინო, არამედ პროპაგანდისტული გადაწყვეტილება. ეს გაკეთებულია საიმისოდ, რომ გაგრძელდეს მიხეილ სააკაშვილის წამება და ეს გაკეთებულია იმისთვის, რომ ხელისუფლების ნარატივი, რომ აი, ახალ წელს მიხეილ სააკაშვილი უნდა შეხვდეს პენიტენციურ დაწესებულებაში", — თქვა მან.

გვიან ღამით სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება პენიტენციურმა სამსახურმა ინფორმაციის გავრცელებიდან 9 საათის შემდეგ გაავრცელა და დაადასტურა, რომ სააკაშვილი რუსთავის ციხეშია.

მანამდე, 29 დეკემბერს მედიაში გავრცელდა ინფორმაცია, რომ სააკაშვილის მკურნალი ექიმის, ნინო გოგორიშვილის ჯანმრთელობის მდგომარეობა გაუარესდა. იმავე დღეს სახალხო დამცველის წარმომადგენელმა, საბა ბრაჭველმა თქვა, რომ სააკაშვილს, ამ ეტაპზე, ექიმი არ ჰყავს.

28 დეკემბერს, გორის ჰოსპიტალში სააკაშვილის ექიმმა, ნინო გოგორიშვილმა ექსპრეზიდენტის ადვოკატი, ნიკა გვარამია შეცდომაში შეყვანაში დაადანაშაულა. ნიკა გვარამიამ წაიკითხა ოქმი, სადაც, მისი თქმით, ნინო გოგორიშვილი საუბრობს, თუ რა მოხდა 27 დეკემბერს, როდესაც სააკაშვილს გადაყვანის შესახებ აცნობეს.