სახალხო დამცველის წარმომადგენელმა, საბა ბრაჭველმა გორის ჰოსპიტალში მიხეილ სააკაშვილთან შეხვედრის შემდეგ განაცხადა, რომ როგორც გაიგეს, 27 დეკემბერს ექსპრეზიდენტს ახალი დიაგნოზი დაუსვეს.

"ვიმყოფებოდით ვიზიტით ჰოსპიტალში, როგორც იცით, შევხვდი, როგორც მკურნალ ექიმ-ნევროლოგს, ისე ადმინისტრაციის წარმომადგენლებს და თავად პაციენტსაც. როგორც გავიგეთ, 27 დეკემბერს არის დასმული ახალი დიაგნოზი, რომელსაც ამ ეტაპისთვის არ გავახმაურებთ", — თქვა მან.

ბრაჭველის თქმით, მას შემდეგ, რაც მათი ექიმები შეაფასებენ ახალ დიაგნოზს, გადაწყვეტენ იმას, თუ რამდენად იძლევა ეს დიაგნოზი იმის შესაძლებლობას, რომ პაციენტი სხვა დაწესებულებაში გადაიყვანონ. მისივე განცხადებით, სააკაშვილი სხვადასხვა სამედიცინო პროფილის წარმომადგენელთან შეხვედრას ითხოვს.

"ახალი დიაგნოზი რაც დაისვა, ამასთან დაკავშირებით ჩვენ გვინდა, რომ ჩვენმა ექიმებმა შეაფასონ ეს დიაგნოზი და ასევე, სამედიცინო მასალები, რომელიც დღესაც, სამწუხაროდ, არ მოგვეცა საშუალება, რომ გავცნობოდით. ამის შემდგომ ჩვენი ექიმები გადაწყვეტენ იმას, რამდენად იძლევა ეს დიაგნოზი იმის შესაძლებლობას, რომ პაციენტი გადაყვანილ იქნას სხვა დაწესებულებაში", — აცხადებს ომბუდსმენის წარმომადგენელი.

ბრაჭველი ამბობს, რომ მას შემდეგ, რაც სააკაშვილის მკურნალმა ექიმმა, ნინო გოგორიშვილმა ჯანმრთელობის მდგომარეობის გამო, ექსპრეზიდენტის მკურნალობაზე უარი თქვა, ამ მომენტისთვის სააკაშვილს ექიმი არ ჰყავს.

დღეს მედიაში გავრცელდა ინფორმაცია, რომ სააკაშვილის მკურნალი ექიმის ჯანმრთელობის მდგომარეობა გაუარესდა.

28 დეკემბერს გორის ჰოსპიტალში სააკაშვილის მკურნალმა ექიმმა, ნინო გოგორიშვილმა ექსპრეზიდენტის ადვოკატი, ნიკა გვარამია შეცდომაში შეყვანაში დაადანაშაულა. ნიკა გვარამიამ წაიკითხა ოქმი, სადაც, მისი თქმით, ექიმი, ნინო გოგორიშვილი საუბრობს, თუ რა მოხდა 27 დეკემბერს, როდესაც სააკაშვილს გადაყვანის შესახებ აცნობეს.

27 დეკემბერს, მთელი საღამოს განმავლობაში ვრცელდებოდა ინფორმაცია გორის სამხედრო ჰოსპიტლიდან მიხეილ სააკაშვილის შესაძლო გადაყვანის შესახებ. თუმცა ამის შესახებ ინფორმირებულები არ იყვნენ სააკაშვილის ადვოკატები და ოჯახის წევრები.

მოგვიანებით სახალხო დამცველის წარმომადგენელი ანა ჯანიაშვილი გორის ჰოსპიტალში მივიდა. მისი განცხადებით, სააკაშვილმა უთხრა, რომ რუსთავის ციხეში მის გადაყვანას, რა დროსაც გონება დაკარგა. ჯანიაშვილის თქმით, ამ შემთხვევას სახალხო დამცველი შეისწავლის.

სააკაშვილის გადაყვანაზე ინფორმაცია უწყებამ მხოლოდ 28 დეკემბერს დაადასტურა. როგორც დეკემბერს პენიტენციურმა სამსახურმა თქვა, რომ გორის სამხედრო ჰოსპიტალმა სააკაშვილი გაწერა, თუმცა გადაყვანა დროებით გადაიდო.