ჯანდაცვის მინისტრის მოადგილის, თამარ გაბუნიას განცხადებით, საზოგადოებას მალე მიაწვდიან ინფორმაციას, როდის იქნება ხელმისაწვდომი აშშ-ის სურსათისა და წამლების ადმინისტრაციის (FDA) მიერ ავტორიზებული Pfizer-ის ანტივირუსული, კორონავირუსის საწინააღმდეგო მედიკამენტი.

"ჩვენ ამაზე მუშაობა დაწყებული გვაქვს და მოკლე ხანში შესაძლებლობა გვექნება, რომ საზოგადოებას გავაცნოთ ის დეტალები, თუ როდის იქნება ხელმისაწვდომი ეს მედიკამენტი. მედიკამენტის გამოყენება ხდება ბინის პირობებშიც და მას არ სჭირდება განსაკუთრებული ზედამხედევლობა მოხმარების პროცესში. რეკომენდაცია და, რა თქმა უნდა, უმჯობესია, რომ პროგნოზულად მაღალი რისკი ვისაც აქვს, იმ პირებში მოხდეს მედიკამენტის გამოყენება და ძალიან იმედმომცემია ის შედეგები, რომელსაც ამ მედიკამენტი კვლევების შედეგად უჩვენებს", — განაცხადა მან.

მისივე თქმით, მიუხედავად კვლევების შედეგებისა, რომ წამალი ჰოსპიტალიზაციის, გართულებებისა და ლეტალობის შემთხვევებს შეამცირებს, ის ვაქცინას "ვერ ჩაანაცვლებს".

FDA-მ პრეპარატის გადაუდებელი გამოყენების ავტორიზაცია გუშინ 22 დეკემბერს გასცა. 12 წლის და უფროსი ასაკის მაღალი რისკის მქონე ადამიანებს, რომლებიც იწონიან მინიმუმ 40 კილოს და კორონავირუსი აქვთ დადასტურებული, ექიმის დანიშნულებით, სამკურნალოდ ამ პრეპარატის მიღება შეეძლებათ.

FDA-ის თანახმად, აბის მიღება პაციენტმა Covid-19-ის გამოვლენისთანავე უნდა დაიწყოს და წამალი სიმპტომების დაწყებიდან ხუთი დღის განმავლობაში უნდა მიიღოს. პაქსლოვიდი აერთიანებს ახალ ანტივირუსულ პრეპარატს და ინიშნება სამი აბის სახით, დღეში ორჯერ ხუთი დღის განმავლობაში.