სააპელაციო სასამართლომ დიუშენის კუნთოვანი დისტროფიით დაავადებული ბექა შონიას სარჩელი სუნთქვის აპარატის და სამედიცინო მომსახურებების შინ მიღებაზე დააკმაყოფილა — ინფორმაციას პარტნიორობა ადამიანის უფლებებისთვის (PHR) ავრცელებს.

ორგანიზაციის განცხადებით, ეს არის პირველი შემთხვევა, როდესაც დიუშენის დისტროფიის მქონე პირმა საკუთარი და მსგავსი დიაგნოზის მქონე პირებისათვის, სასამართლოსთვის მიმართვის გზით, მოიპოვა სამედიცინო მომსახურება და სასიცოცხლოდ აუცილებელი აპარატი, მიმართვიდან 1 თვის განმავლობაში.

ბექა შონია 5 წელია ვერ გამოდის სახლიდან და ამის გამო ვერ იღებს ვერანაირ სამედიცინო მომსახურებას. სუნთქვის აპარატის საყიდლად მისმა ოჯახმა საცხოვრებელი ბინა გაყიდა.

"ბექამ სასამართლოს თავის უფლებების დასაცავად 2026 წლის მაისში მიმართა და თავად მონაწილეობდა სასამართლო სხდომებში ონლაინ ჩართვის გზით.

ეს არის პირველი შემთხვევა, როდესაც დიუშენის დისტროფიის მქონე პირმა საკუთარი და მსგავსი დიაგნოზის მქონე პირებისათვის, სასამართლოსთვის მიმართვის გზით, მოიპოვა სამედიცინო მომსახურება და სასიცოცხლოდ აუცილებელი აპარატი, მიმართვიდან 1 თვის განმავლობაში.

აღნიშნული პრეცედენტი საშუალებას მისცემს ყველა შეზღუდული შესაძლებლობის მქონე პირს ისარგებლოს ანალოგიური მომსახურებით, აგრეთვე სასამართლოსთვის მიმართვის გზით.

PHR-ის ადვოკატები, პარტნიორ ორგანიზაცია Validity Foundation-თან ერთად, აგრძელებენ შშმ პირთა თანასწორობისთვის ბრძოლას და სისტემური ცვლილებების განხორციელებას მართლმსაჯულების გამოყენებით.

ბექა შონიას საქმის განხილვა გაგრძელდება მის მიერ განცდილი ზიანის სრულად ანაზღაურებისა და ჯანდაცვის სამინისტროს პროგრამებში ძირეული ცვლილებების მიღწევამდე, დიუშენის დისტროფიის მქონე ყველა პირის უფლებების დაცვის მიზნით!" — ნათქვამია PHR-ს განცხადებაში.

ორგანიზაციის წარმომადგენელმა "ტვ პირველთან" განაცხადა, რომ ბექა შონიამ სასამართლოს პირველ ინსტანციაზე წააგო და მათ სააპელაციო სასამართლოში გადაწყვეტილების გასაჩივრება მოუწიათ.

"ეს საქმე ეხებოდა დიუშენის დიაგნოზის მქონე პირებისთვის ბინაზე სამედიცინო მომსახურებას. ანუ, ის მომსახურებები, რომლებიც შეიძლება ბინაზე მიიღოს პაციენტმა, არ იყო გათვალისწინებული მთავრობის მიერ მიღებული დადგენილებით. თქვენ მოგეხსენებათ, რომ არსებობს მძიმე ფორმები დიუშენის დისტროფიის, რის დროსაც პაციენტი ჟანგბადდამოკიდებულია, ეტლში ზის. შესაბამისად, მისთვის სასიცოცხლოდ მნიშვნელოვანი იყო ბინაზე მიეღო სხვადასხვა პროფილის ექიმის მომსახურება, ლაბორატორიული კვლევები.

ბექას ეს მოთხოვნა პირველი ინსტანციის სასამართლოში არ დაკმაყოფილდა და სწორედ ეს გადაწყვეტილება გავასაჩივრეთ სააპელაციო სასამართლოში. სააპელაციო სასამართლომ კი სრულად დაკმაყოფილა ჩვენი მოთხოვნა," — განაცხადა ორგანიზაციის წარმომადგენელმა.