საქართველოს მე-5 პრეზიდენტმა, სალომე ზურაბიშვილმა ფეისბუქ-ლაივში განაცხადა, რომ "ოცნების" დღის წესრიგი რუსეთის დღის წესრიგია და ამის დასტურია პარლამენტის თავმჯდომარის, შალვა პაპუაშვილის განცხადება იმის შესახებ, რომ "ბოლოს და ბოლოს ინტერესიც არა აქვთ ევროკავშირში შესვლის".

"ოცნების" დღის წესრიგი არ არის "ოცნების" დღის წესრიგი, ეს არის რუსეთის დღის წესრიგი. "ოცნების" დღევანდელი კურსი, რომელიც გაახმოვანა კიდევ ერთხელ პაპუაშვილმა და კიდევ ერთი ნაბიჯით, ერთი საფეხურით წინ წავიდა, როცა თქვა, რომ ჩვენ ბოლოს და ბოლოს ინტერესიც არა გვაქვს ევროკავშირში შესვლის, რას მოგვიტანსო და ეს არის რუსეთის გზავნილი, რუსეთის ინსტრუქცია და ამიტომ "ქართული ოცნება" უკვე არაფერს აღარ ნიშნავს.

პირდაპირ განვიხილოთ, საიდან მოდის ეს. ამერიკის საელჩოს, თუ ადმინისტრაციის განცხადება ამას არ შეცვლის, იმიტომ, რომ ეს არის ის კურსი, რომელიც ვალდებული არიან ესენი, რომ გაატარონ. ეს მხოლოდ შეიცვლება, როცა ძალთა თანაფარდობა შეიცვლება და მივხედოთ უფრო იმას, თუ რა ხდება უკრაინასა და რუსეთს შორის, რა დღეშია თვით რუსეთი. რუსეთის დასუსტება არის ამ კურსის შეფერხება, ამიტომ იქ არის მთავარი ჩვენი გამძლეობა", — განაცხადა საქართველოს მე-5 პრეზიდენტმა, სალომე ზურაბიშვილმა ფეისბუქ-ლაივში.

შეგახსენებთ, რომ პარლამენტის თავმჯდომარემ, შალვა პაპუაშვილმა სოციალურ ქსელში დაწერა, რომ სულ უფრო აქტუალური გახდება კითხვა: რა აზრი აქვს ევროკავშირში წევრობას, თუ წევრობის უმთავრეს სარგებელსა და ბერკეტებს თავიდანვე გართმევენ?

"სულ უფრო აქტუალური გახდება კითხვა: რა აზრი აქვს წევრობას, თუ წევრობის უმთავრეს სარგებელსა და ბერკეტებს თავიდანვე გართმევენ?

ევროკავშირში წევრობა მნიშვნელოვანი სწორედ იმიტომ არის, რომ ქვეყანამ შეძლოს მისთვის სასარგებლო გადაწყვეტილებების მხარდაჭერა, საკუთარი ინტერესების გატანა და მისთვის დამაზიანებელი გადაწყვეტილებების შეჩერება.

თუ ქვეყანას ამ შესაძლებლობას ართმევენ, მაშინ ევროკავშირსაც ართმევენ მის მნიშვნელობას, როგორც ეროვნული ინტერესების დაცვის საშუალებას. შესაბამისად, ქრება წევრობის პოლიტიკური ხიბლი და ფუნდამენტური მოტივაციაც.

უფრო მეტიც, ასეთ პირობებში ევროკავშირის გარეთ დარჩენა შესაძლოა პატარა სახელმწიფოსთვის უფრო სასარგებლოც კი აღმოჩნდეს, რადგან მას, სულ მცირე, დამოუკიდებელი გადაწყვეტილების მიღების თავისუფლება შეუნარჩუნდება", — დაწერა შალვა პაპუაშვილი სოციალურ ქსელში.