ემი ვ. დიაზი საქართველოში აშშ-ის საელჩოში საქმეთა დროებითი რწმუნებულის მოვალეობის შემსრულებლად დაინიშნა. ამის შესახებ ინფორმაცია საელჩოს ოფიციალურ ვებგვერდზე გამოქვეყნდა. რაც იმას ნიშნავს, რომ ის საელჩოს ხელმძღვანელის ფუნქციებს დროებით შეასრულებს.

საელჩოს ოფიციალურ ვებგვერდი წერს, რომ ემი ვ. დიაზი აშშ-ის საგარეო სამსახურის უფროსი დიპლომატიური კორპუსის (Senior Foreign Service) კარიერული წევრია. დიასის წინა თანამდებობებს შორისაა: მალავის დედაქალაქ ლილონგვეში აშშ-ის საელჩოში საქმეთა დროებითი რწმუნებულისა და მისიის ხელმძღვანელის მოადგილის პოზიციები; აშშ-ის სახელმწიფო დეპარტამენტის ევროპის საკითხების პოლიტიკისა და გლობალური საკითხების ოფისის დირექტორის მოადგილის თანამდებობა; ზიმბაბვეს დედაქალაქ ჰარარეში აშშ-ის საელჩოს საკონსულო განყოფილების ხელმძღვანელის პოზიცია; ასევე ქაბულში აშშ-ის საელჩოს ნარკოტიკებთან ბრძოლის ჯგუფის ხელმძღვანელობა.

სხვადასხვა პერიოდში ის ასევე მუშაობდა პანამის დედაქალაქ პანამა-სიტიში აშშ-ის საელჩოში კანონის უზენაესობის საკითხების მრჩევლად და ამერიკის სამიტის კოორდინატორად; თბილისში აშშ-ის საელჩოში შიდა პოლიტიკური განყოფილების ხელმძღვანელად; ჰარარეში აშშ-ის საელჩოში ვიცე-კონსულად; და მექსიკის ქალაქ მონტერეიში აშშ-ის გენერალურ საკონსულოში ვიცე-კონსულად.

ემი დიაზი აშშ-ის სახელმწიფო დეპარტამენტს 2002 წელს, საპრეზიდენტო მენეჯმენტის სტიპენდიის პროგრამის ფარგლებში შეუერთდა, ხოლო 2005 წელს საგარეო სამსახურში გადავიდა.

მან დაამთავრა სენტ-ჯონის კოლეჯი (ანაპოლისი, მერილენდის შტატი) და არიზონის უნივერსიტეტში იურიდიული დოქტორის ხარისხი მოიპოვა.

დიასი აშშ-ის სახელმწიფო დეპარტამენტის მიერ არაერთხელ არის დაჯილდოებული უმაღლესი და განსაკუთრებული დამსახურებისთვის მინიჭებული საპატიო ჯილდოებით.

ის დაქორწინებულია და ერთი შვილი ჰყავს.

აშშ-ის ელჩმა საქართველოში, რობინ დანიგანმა, 2025 წლის ივნისში განაცხადა, რომ პირადი გადაწყვეტილებით გადიოდა პენსიაზე და ქვეყანას 2025 წლის ივლისში დატოვებდა.

მისი წასვლის შემდეგ საელჩოს დროებით ხელმძღვანელობდა ალან პერსელი საქმეთა დროებითი რწმუნებულის (Chargé d'Affaires ad interim) სტატუსით.