ოკუპირებული აფხაზეთის დე-ფაქტო საგარეო საქმეთა სამინისტრო აცხადებს, რომ ნაურუმ მათთან დიპლომატიური ურთიერთობები "უპრეცედენტო და სისტემური ზეწოლის გამო" გაწყვიტა.

მათ მიერ გავრცელებულ განცხადებაში ნათქვამია, რომ "აფხაზეთსა და ნაურუს შორის თანამშრომლობის განვითარებას მუდმივად ეწინააღმდეგებოდნენ საქართველო და მისი დასავლელი პარტნიორები".

"მას შემდეგ, რაც ნაურუმ 2009 წლის 15 დეკემბერს აფხაზეთის დამოუკიდებლობა აღიარა და ორ მხარეს შორის დიპლომატიური ურთიერთობები დამყარდა, ჩამოყალიბდა კონსტრუქციული პოლიტიკური დიალოგი და საფუძველი ჩაეყარა სახელშეკრულებო-სამართლებრივ თანამშრომლობას. ორმხრივი ურთიერთობების განვითარების მნიშვნელოვან ეტაპად სახელდება მაღალი დონის ორმხრივი ვიზიტები, მათ შორის ნაურუს ხელმძღვანელობის ვიზიტი აფხაზეთში და საპასუხო ვიზიტი, რომლის დროსაც აფხაზურ დელეგაციას დე-ფაქტო საგარეო საქმეთა მინისტრი ხელმძღვანელობდა. ამ კონტაქტების შედეგად მხარეებმა განაგრძეს თანამშრომლობის განვითარება, მათ შორის ერთობლივი პროექტებისა და ინიციატივების განხორციელება.

აფხაზეთსა და ნაურუს შორის თანამშრომლობის განვითარებას მუდმივად ეწინააღმდეგებოდნენ საქართველო და მისი დასავლელი პარტნიორები", — წერია განცხადებაში.

დე-ფაქტო უწყების მტკიცებით, როდესაც ერთობლივი ინიციატივები პრაქტიკულ ეტაპზე გადავიდა, ნაურუს წინააღმდეგ დაიწყო აგრესიული საგარეო ზეწოლის კამპანია. მათივე შეფასებით, გამოყენებული იყო "დაუშვებელი ზეწოლის მთელი არსენალი" — პოლიტიკური შანტაჟიდან და დიპლომატიური ზეწოლიდან დაწყებული, ფინანსურ-ეკონომიკური სანქციებით დასრულებული, რომელთა მიზანი ნაურუს სუვერენული გადაწყვეტილების შეცვლა იყო.

შეგახსენებთ, რომ 29 ივლისს საქართველოს საგარეო უწყებამ გაავრცელა ინფორმაცია იმის შესახებ, რომ ნაურუს რესპუბლიკამ ოკუპირებულ ცხინვალის რეგიონთან და ოკუპირებულ აფხაზეთთან დიპლომატიური ურთიერთობები გააუქმა. უწყება აცხადებს, რომ "საქართველო გამოთქვამს მზადყოფნას დაამყაროს ნაურუს რესპუბლიკასთან დიპლომატიური ურთიერთობები".